AR lakah mipui him loah ngai
Tunhnaia minister chunga Assam Rifles chet duh dan enin mipui phei chu an chungah kan him lo hlea an ngaih thu Industries & Commerce Service Association chuan an sawi.
Mizoram Industries & Commerce Service Association (MICOSA) thuchhuak chuan, minister F Rodingliana official tour programme, October 9-17 chhunga Assam Rifles-in Kawlbem dai leh Ngopa daia check tuma an lo tih din tum duh tawk loa, Seling dai leh Zemabawk daia ralthuam chelek chunga an lo tiding lehzel chu tihluihnaa inrikrapnaah an ngai tih a sawi.
‘Assam Rifles chet dan hi democracy zahlohna leh palzutnaah kan ngai a. A bikin, minister lirtheia national flag intar pawh zah miah loa an che hi India Danpui zah lohnaah kan ngai. Dan ang thlapa mipuiin an aiawh tura an thlantlin, state sawrkara minister tura larsap-in thutiam laktira a lakluh chungah pawh zahna nei miah loa an cheksawlh duh a nih chuan, Mizo mipui hi Assam Rifles lakah kan him lo hle ah kan ngai,’ a ti.
Assam Rifles duty, democracy zah lo, India danpui pawh zah lo, Mizo mipui pawh zah lo bawk te chu na taka an chunga dan anga hrem an phut tih sawiin, hetiang hi a thlen nawn tawh lohna’n Mizoram sawrkar leh India sawrkar chu hma la turin an phut tih a sawi.
Mizoram Chamber of Commerce & Industry pawhin thuchhuah siamin, namen loa Aizawl dai maia Assam Rifles-in minister an tibuai chu hriatthiam harsa an tih thu sawiin, ‘Democracy kalphung niin kan hre thei loa, hetiang khawpa mipui aiawh minister chunga hleilenna thleng hi thil dik niin kan hre loa, a mawhphurtu hi a na thei ang bera hrem ni rawh se,’ a ti.
AR lakah mipui him loah ngai
