Assam Rifles ram luah, Lammual leh a chhehvela thing ding ho chhinchhiah a ni dawn a. Centre for Environment & Social Justice (CESJ) chuan he hna hi a thawk dawn. CESJ hian he hmalakna tur hi Ningani khan Lammualah a khuhhawng a. Assam Rifles hotute nen an lo sawi lawk tawh angin, an ram luah huamchhunga thing chhinchhiah bakah heritage building tichhe zawnga kut thlak a nih lohna turin tan an la dawn a, Assam Rifles-in an chhuahsan hnu ah hmasawnna ruhrel din tum pawh nise, heng chhinchhiah leh humhalh ho tichhe lo zawnga hma lak nise an duh tih an sawi a ni.
Assam Rifles ram luah chhunga thing ding chu Aizawl khawpui tan boruak tha hip tur pechhuaktu a nih avangin humhalh tlat a tul tih an sawi a. Helai hmun bak hi Aizawl khawpui chhungah ‘urban forest’ a awm chuan loh avangin ngaihhlut a tul tih an sawi.
Chhinchhiah hna thawk turte hi Mizoram University-a Botany zirlai leh PhD scholar-te an ni dawn a. Kumin November hi chuan zawh hman an tum. Lammual chhehvel hi Google earth hmangin an then hrang vek dawn a, a theih chin chinah thing hi Mizo hminga dah a ni ang. Thing pangngai bakah a bukte leh hnim, cm.10 chunglam chu chhinchhiah an ni ang.
Thing pakhatin carbon dioxide engzat nge a lo hip bo theih tih chhut a ni anga, oxyegn a pekchhuah chu suma chantira lei tur ni ta se, engzat man nge, tih te thlenga chhut a ni ang. An thing leh thlai chhinchhiah hi damdawi atana hlut nei, sava leh ramsa in an tlan duh zawng, hnam leh sakhaw ziaranga thing ngaihhlut bik, incheina/ inhnawih siamna kawnga hlutna nei, tui hna titam thei chi angte thliarin, hlutna hrang hrang nei thing awm dan chu chhinchhiah a ni dawn a ni.
AR ram luaha thing ho chhianchhiah tha dawn
