Arab ram hmun thenkhata awmpui hna leh a dangte hmuhsak theih nia sawia lut thla zingah buaina tawk an awm belh zel a. An zinga 10 chuang chu mi thahnemngaite leh Indian Embassy puihna in Mizoramah an haw leh tawh.
India ram pawn, a bikin Arab ram hmun thenkhata hna thawk tura pui theitu, ‘agency’ intiten an tirhluh zingah, sawi leh an beisei ang niloa hna thawk leh dinhmun tha lo taka awmtir mi engemawzat an awm tih hria in mi thahnemngai, Mizoram ami leh United Aram Emirates lama Mizo, hna thawka awm nghet tawhten an remhriat leh theih ang angin an pui a. Heng zing ami, Lalremsangi Fanai chuan tunhnaiah hetiang harsatna tawk mi 10 chuang chu an awmna hmun atanga chhuakin, harsa takin Mizoram an lo thlen leh tawh thu The Aizawl Post a hrilh.
Mizoramah rampawn lama hna thawh tumte buaipuia thawn thei nia kinsawi agency 42 an awm mek tih Lalremsangi Fanai hian a sawi a. Heng agency hian India ram pawna hna thawk tur thawn chhuah theihna licence an nei lo vek niin a sawi. Buaina tawk mek, in report tawh mi 35 an awm thu sawiin, buaina tawk mekte chu agency hrang hrang pakua atanga kal an ni tih a sawi.
Mizo thalai buaina tawk mekte khulh chhuah nan agency-in pawisa an phut zel tih sawiin, a tlangpuiin cheng nuai 2 atanga nuai 3 inkar an phut thin tih a sawi. Syria rama awmte chu Dubai agency atangin US dollar 4000 vela lei an nih thin avangin khulh chhuah nan US dollar 6000 vel zel an phut thin thu leh a buaithlak zual thu a sawi a ni.
Heng rama Indian Embassy-ten Mizoram sawrkar chu hemi chungchanga hma la thuai tur leh ramdanga hnathawk tur thalai thawn chhuak tawh rih lo turin an ngen tih Lalremsangi Fanai hian a sawi a. Mizoram sawrkar bakah Union Home ministry leh External Affairs ministry-ah hma la tura ngenna a thawn tawh a; a hmun ngeiah hma la tura kal a tum thu a sawi bawk.
“Mizo thalai, ramdanga hna thawh tumten kan kalna tur leh hnathawh dan tur bakah thil hrang hrang chik lehzuala zirchiang hmasa a, kan hriat loh chin chu a hre zawkte zawt thin turin ka ngen a ni,” a ti a. Ram pawna hna thawka kal, buaina tawk mek zingah nu leh pa hriatpui loh an awm nual tih sawiin, nu leh pate chu an fate awmna leh hnathawh hrechiang a, an fate ngaihsak zual turin a chah.
Arab rama thawk tura tirh buaina tawk awm belh zel
