Mizoram chief minister Lalduhoma’n Arakan Army te thian that a tum a, hei hi Myanmar-a Zo hnahthlakte chuan mak an ti.
Chief minister hian kar hmasa khan USA-a Indianapolis-ah Arakan Army te thian that a duh thu hi a sawi a, “Arakan Army te thleng pawh hian, eng nge ni, a… inbiakna neih pawh ka duh a ni keimah hian,” a ti a, “A chhan chu Arakan Army te nen kan inhmuhthiam loh chuan, keini aiin an chak zawk,” a ti bawk.
Arakan Army hi Myanmar-a Rakhine state mite tana zalenna sualtute an ni a, tun hma an pi leh pute huna an ropuina neih let leh tuma beitu, ralthuam leka che an ni.
Zo hnahthlak an ni lo a, Zo hnahthlakte ram thenkhat chu lak an tumah ngaih niin, tun hnaiah pawh khaw thenkhat chu an la tawh.
Myanmar-a Chin mite tana beitu, ralthuam leka che, Chin National Front (CNF) te nen pawh Arakan Army hi an inngeih lo.
CNF vice president Dr Sui Khar-a chuan phone hmanga amah betu Post News Service hnenah, “Arakan Army hi CNF hmelma ringawt an ni lo a, Zo hnahthlakte hmelma an ni a, kan ram min chuh a ni,” a ti.
Mizoram chief minister-in thian thaa neih a duh chu mak a tih thu a sawi a, “Mi tinin ngaihdan kan nei a, Pu Lalduhoma pawhin ngaihdan a nei a ni a, mahse Mizoram sorkarin Arakan Army a kawmngeih a nih chuan Myanmar-a Zo hnahthlakte tan leh Mizoram tan a tha lo,” a ti.
Arakan Army te hian Chin state-a Zo hnahthlakte awmna pawh lak an tum niin Dr Sui Khar chuan a sawi a, kuminah pawh Paletwa an la tawh a, Matupi vel khaw thenkhat an la niin a sawi bawk.
“An lian a, an phur a. An lian zel a nih chuan ram kan chan zel ang tih a hlauhawm a,” a ti.
“India border-ah Arakan Army an awm hi Mizoram tan a him lo a, Mizoram hnaihah an in-base ang tih hi a hlauhawm. Drug a hluar phah ang, drug hi an sum source a ni a, meth hi an source a ni,” a ti bawk.
Arakan Army \hian \hat tum mak ti
