Argentina in Egypt an lehthal

World Cup 2026 khelh mekah Thawhlehni zan khan inlehthalna lian a thleng a, inkhel hmuhnawm takah si hnih faia hnufual tawh Argentina in 3-2 in Egypt an lehthal. Egypt lehthlaltu champion lai Argentina hian quarter-final-ah Colombia hnehtu Switzerland an hmachhawn zui leh dawn.
Aigupta sal tang Argentina
Last 32-a an khingpui Cape Verde lakah derthawng taka lo chak tawh Argentina in insiamthat ngei tumin Egypt an hmachhawn a, an player thenkhat an siksawk. Tlarhmaa Messi kawppui thin Lautaro Martinez chu player taima leh tlan chak Julian Alvarez-a’n a thlak a. Midfielder Almada chu Leandro Paredes-a’n a thlak bakah hliam vanga inlan thei lo Medina hmunruk chu Tagliafico-a’n a luah bawk. An khingpuite an che reng a, an awlai dawn lo tih hre chungin head coach Lionel Scaloni-a’n a team a rem.
Egypt lam hi Mohamed Salah hovin an inlan a, Manchester City forward Omar Marmoush chu bench-ah a thu thung. Aigupta lam hian champion lai Argentina hneh ngei tumin tan an khawh a, khelh pawh an khel tha viau. Hun rei tak chhung si hnihin hma an hruai hial nghe nghe a. An ban phak hman thuak thuak quarter-final chu an kut ata pawhthlaksak an ni a, thla tak atanga an thlir a ngai ta thung.
Argentina lakah rinkai ni phak lo Egypt hian bul an tan tha viau a, goal pawh an thun hma hle. Inkhel tan atanga minute 15-na lekah Yasser Ibrahim chuan Marwan Attia cross tha tak chu fuh zetin a tauh goal a, hmahruaina goal a thun. Ibrahim hian a ball hmuh hi a tauh fuh ngang mai a, Argentina si nghak chetha thin tak Emiliano Martinez a che hman eih lo.
Goal an chhuah hnu lawkah Argentina in goal thun theihna hun tha an nei zui ve leh nghal a, penalty an hmu. Tagliafico penalty hlawhchhuah chu Lionel Messi chuan petin a pet tha lo hle a, a thelh. Messi hian Cape Verde lakah penalty a lo thelh tawh bawk a, a zawnin penalty a thelh ringawt. World Cup-a hnuhma nei tha tak Messi hian hnuhma chhe lamah pawh record a siam tel a, World Cup-ah penalty thelh ngun ber a ni a, vawi riat petin vawi li a thelh tawh.
Argentina hian chawlhlawk hmain an si phurh an sut tueh thei hle a, Mac Allister leh Julian Alvarez ten si nghak Ahmed Shobeir an paltlang thei lo a, si phur chungin chawlhlawk an hmang.
Chawlhlawk hnu lamah Argentina an insiamtha thei mai chuang lova, Aigupta salah an tang chhunzawm zel. Lionel Messi a chet hleitheih miau loh vangin Argentina hian hma an sawn thei lo. Goal an thun an mamawh em em laiin goal an chhuah belh leh ta zawk. An goal thun mawi tak hnawl a nih hnu lawkah Egypt in fuh zetin an nawr tlang nawn leh ngat a, Haissem Hassan siamsak tha tak chu Mostafa Zico chuan minute 67-naah chiang zetin a pet goal a, an hmahruaina a tizau. Goal thun an mamawh em em laia goal an chhuah belh zawk si vangin Argentina hi Aigupta salah an tang nghet leh zual.
Sal tang chhuahna dar
Si hnih an phurh hnuin Argentina coach Scaloni-a’n ruahmanna thar a nei a, a player a thlak kual. Lautaro Martinez leh Lopez te an lut a, striker pahnih hmangin an khingpuite an nawr. A laia khel tha lo Messi chu a sirah a dah a, Messi hnen atangin ball a chhuak tam ta chiah a, Egypt an bet leh zual. Messi cross tha tak atangin Cristian Romero chuan fuh zetin a tauh goal a, minute 89-naah an si phurh a sut then. Messi hian assist a neih belh leh tak vangin World Cup-ah assist vawi kua neiin assist ngah ber record thar a siam.
An si phurh an sut vangin an phur leh zual a, an khingpuite an nawr na leh zual. Messi atanga ball kal zel chu amah Messi ngei chuan fuh zetin a hlap goal a, minute 83-naah goal ropui thunin, an si phurh a sut zo.
2-2 a nih hnuin inkhel a hmuhnawm leh zual a, Egypt in hmahruai nawn leh ngei tumin tan an khawh. Na takin an khingpuite an nawr a, Mohamed Salah chuan penalty a hlawhchhuak ngeiah an ngai a, mah se VAR rawn pawh an phut hlawhtling zo ta lo. Hetihlai hian Argentina lamin fuh takin an nawr let thut a, Lautaro Martinez siamsak tha tak atangin Enzo Fernandes chuan fuh zetin minute 90+2-ah a tauh goal a, Aigupta sal atangin an talchhuak ta nge nge.
Egypt lamain an si phurh sut tumin tan khawh zui viau mah se an hlawhtling zo tawh lova, Argentina lakah uiawm takin an tlawm a. An tlawm danah an lungawi lo zui hle nghe nghe. Egypt laka Argentina chak dan hian sawisel a hlawh zui hle a. Egypt hi Fifa hnenah zual kovin an referee chu World Cup-a hman zui tawh loh an phut. An lungawi lo hi football ngainatu tam takin an pawmpui a, an thlawp viau nghe nghe.
Egypt hnehtu Argentina hian quarter-final ah Switzerland an hmachhawn zui leh ang.