Thawhlehni khan international friendly match khelh a ni a, football ram ropui pahnih; Argentina leh Brazil ten awlsam takin hnehna an chang. Uruguay laka tlawm Argentina chu Costa Rica lakah an inhrithlaa 7-0 ngawtin hnehna an chang. Brazil pawhin mikhual an nihna hmunah Singapore chu 7-0 in an sawp ve bawk.
Argentina an inhrithla
Argentina hian an player ropui Lionel Messi chawlh hnua an khelh hmasak ber Uruguay an hneh lo nghal. Messi tel lovin entu mipui an hloh tam hle a, chakna an hloh tel bawk. Uruguay laka an tlawmna hi Costa Rica lakah an inhrithlaa 7-0 ngawtin an chak.
Argentina hian Mario Alberto Kempe a an mikhual Costa Rica lakah bul an tan tha viau a, club lian hrang hrang ten lak tuma an ngaihvven Nico Paz chuan inkhel tan atanga minute 8-na lekah hmahruaina goal a thun nghal. Hma taka goal an thun hnuin Julian Alvarez chuan minute 35-naah an goal hnihna a thun. Alvarez goal thun atanga minute thum hnu lekah Nico Paz chuan an goal thumna a thun zui leh nghal. Paz goal thun hnu minute 43-naah Alvarez-a’n an goal lina a thun zui leh cheu a, 4-0 ngawta hmahruai chungin chawlhlawk an hmang.
Chawlhlawk hnu lamah Argentina an khel tha chhunzawm a, Franco Mastantuono chuan minute 48 na leh 88-naah goal a thun a, goal hnih a thun bakah hian Alexis Mac Allister chuan goal khat a thun bawk a. An mikhual Costa Rica te hi an lo sawp zek a ni ber mai.
Brazil 7-0 Singapore
Japan nen an inhnehtawk hnuin Brazil chuan Asia rama mi Singapore an hmachhawn zui leh a, mikhual an nihna Singapore National Stadium-ah 7-0 ngawtin hnehna an chang ve bawk.
Brazil hian mikhual an nihna hmunah bul an tan tha viau a, an player pawimawh Vinicius Junior chuan inkhel tan atanga minute 9-na lekah hmahruaina goal a thun. Vini hian goal hnih dang a thun belh zui leh a, Singapore lakah hattrick a siam.
Vinicius Junior-a’n minute 21 chhung leka hattrick a siam bakah hian Arsenal in January thlaah lak tuma an hel mek Endrick chuan goal khat a thun a. Anni bakah hian Estêvão, leh Rayan ten goal an thun bakah mualneitu player Raoul Bin Suhaimi chuan an lamah a ti-gal bawk a, Singapore lakah Brazil an chak chiang hle.
Argentina leh Brazil an chak awlsam

