London club West Ham United chuan an elpui lian Arsenal lakah an captain Declan Rice an hralhchhuak dawn a. Rice chungchangah inremna an neih fel vek hnuah Arsenal an chet muan vangin Hammers an lung ni lo hle.
Season liam ta atang tawh khan Arsenal manager Mikel Arteta chuan West Ham captain Declan Rice chu an hnena khel turin a lo awt em em tawh a. Nipui bazar inhawn huna lan an tum ber atan Rice hi an dah zui nghal chat bawk. Season a tawp rualin England midfielder Rice lak tumin an dawr nghal chat a, vawi hnih an hlawhchhuam hnuin a vawi thumnaah inremna an nei thei hram. Inremna an nei fel ta cheng a an lak luh leh mai si loh vangin West Ham an lungawi lo ve ta thung.
West Ham leh Arsenal te hi Declan Rice manah £105million in an inrem tawh a. Gunners hian £100million an pe phawt ang a, Rice a khelh that dan a zirin £million an pek belh zui leh ang tih thlenga an inrem tawh bakah man leh mual inpek tlak dan tur thlengin inremna an nei fel vek tawh bawk. Man leh mualah club pahnihte an inrem mai bakah hian Arsenal leh Rice te pawhin mimal inremna an nei fel vek tawh a, hlawh tur thlengin an indawr fel tawh. Hei mai hi a la ni lo cheu a, Rice hian Arsenal zawm turin medical test pawh a pal tlang thlap tawh.
Arsenal leh West Ham te hi ni kaw lian ta July ni 4 khan Rice chungchangah an inrem tawh a. Kar khatah £250,000 hlawh turin Rice leh Arsenal te inrem in, medical test pawh a pal tlang tawh. A thuin contract leh tih fel ngai dangah an inrem vek tawh a, la fel lo awm chhun chu hming sign chauh a ni ngawt tawh. Chuti chung chuan Arsenal hian an lak luh hun tur an tikhawtlai a, tun thlengin an la inla lut fel lo. Arsenal chet dan hi an hun tih khawtlaina mai nia ngaiin West Ham an lungni lo hle.
An player duh lai ngawih ngawih, an captain Declan Rice a chhuak ngei dawn tih a chiang tawh a, West Ham hian Rice hmun ruak luahtu tur lak luh fel vat vat an duh. Hammers hian Rice hmunruak luahtu atan Fulham midfielder Joao Palhinha leh Southampton midfielder James Ward-Prowse te lak tumin an hel mek. Fulham hian an midfielder Palhinha hi £90m ze an chhiar. Palhinha manah hetiang zat em em sen an hreh a. £20m sengin Ward-Prowse lak an ta zawk niin tarlan a ni. Anni pakah hian Leicester City winger Harvey Barnes lak tumin an ngaihven mek bawk a, Branes manah hian £35million sen a ngai dawn. Player thar lak nan sum an mamawh a, Arsenal atanga Rice leina an dawn tur atanga lei tum an ni bawk si nen Arsenal che muang hian an chet a tikhaihlak thui hle. Arsenal an chet muan vangin West Ham an lawm lo ta em em a ni.
Arsenal chunga lawm lo West Ham
