Thawhtan zan khan English Premier League 2025-26 khelh chhunzawm a ni a, inkhel pawimawh takah Arsenal chuan Burnley an hneh a, champion an hnaih leh zual. Manchester City an chak ve zel a nih pawhin Gunners hian champion turin vawi khat chak chiah an mamawh tawh.
Kum 22 chhung zet EPL-ah champion thei tawh lova, ‘Next Season’ thlir zel thin Arsenal hian Emirates Stadium-ah championship lama tlahniam chiang tawh Burnley an mikhual. Burnley hian an tlakhniam tawh vangin an ticket thenkhat pawh champion tum Arsenal an pe then zawk niin sawi ni a. An tan inkhel awmze nei a nih tawh lem loh vangin Arsenal hian an mualah hnehna an chan ngei rin lawk a ni. Rinlawk angin hnehna chang tho mah se harsa leh derthawng tak chungin an chak thung a. Hei hian EPL champion ni turin inkhel awlsam a awm lohzia a tilang chiang hle.
Arsenal manager Mikel Artete chuan chak an mamawhzia a hrethiang a, season kal meka an top-scorer Viktor Gyokeres aiah Burnley laka hlauhawm thin Kai Havertz a luhtir. Havertz a luhtir hi a tifuh a, an chakna goal thuntu a ni. Hmahruaina goal a thun hnuah hnawhchhuah a pumpelh erawh Havertz hi a vannei viau thung.
An mualah chak ngei tuma inlan Arsenal hian na takin an khingpuite an nawr a, ball chang tam viau mah se goal thun theihna hun tha an hmu hleithei bik lo. Leandro Trossard chuan goal a thun teuh hle a, a pet tha tak chuan goal post a per tlat thung. Chawlhlawk hmain Bukayo Saka chuan penalty hlawhchhuak ngeiin inngai bawk mah se an hlawhtling zo lo bawk.
Beisei anga goal an thun theih lawk loh hnuah mamawh chhanna Kai Havertz a inlar ta nge nge. Lu hmang thiam Havertz hian Saka cornet chhuih tha tak chu minute 37-naah a tauh goal a, hmahruaina goal a thun ta nge nge. Havertz goal thun hmang hian 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm tho naa Arsenal in an khingpuite pawngtawng nawr aiin an goal venhim an thlang a, fimkhur takin an inlan. Chawlhlawk hnu lamah hian Havertz chuan Burnley player Lesley Ugochukwu a tlawh a, red card hmuh theihna ni bawk mah se a him hlauh a. Havertz hnawchhuah a nih loh vangin Arsenal an him tel. Hun tawp thlengin goal dang a luh belh tawh lova, Arsenal chuan derthawng tak chunga hnehna changin an mamawh point thum an hmu.
Burnley an hneh vangin Arsenal hian champion an hnaih leh zual a. Thawhleh zanah Manchester City an chak zo lo a nih chuan an champion nghal ang a. City an chak zel a nih pawhin vawi khat an chak leh chuan an champion tho ang.
Arsenal-in champion an hnaih
