English Premier League champion Arsenal chuan Newcastle United captain Bruno Guimaraes lak tumin hma an la chhunzawm zel a, an dawrna hmasa hnawl a nih hnuin an dawr nawn leh. Gunners hian Sum tam zawk sen an huam tawh a, Newcastle nen inremna an neih theih tawh a beiseiawm.
Season tharah tha zual zawka inlan tu Arsenal hian Brazil midfielder Guimaraes hi £70m senga lak tumin an dawr phawt a. Arsenal dawrna hi Newcastle in an lo hnar fithla nghal thuai thung. An dawrna hmasa hnawl ni bawk mah se Guimaraes hi lak ngei an duh si a, sum tam zawk nen thawk nawn lehin Magpies nen hian £80m- £90m vel bawrin an inrem theih beisei a ni. Guimaraen ngei pawh hian Arsenal zawm a duh a, Newcastle tan pawh chhuahtir mai a thlanawm tawh zawk dawn niin a lang.
Gunners hian Newcastle United leh Brazil midfielder Bruno Guimaraes hi an awt hle a, nipui bazar inhawn chhunga an lak tum berah an dah. Brazil tan World Cup khela a zinchhuah vangin hmaichhanah an la titipui thei lo reng. World Cup an khelh zawh hnuin Spain a Newcastle in training an neihna hmun La Manga a zawm fel leh tawh.
Midfielder mit la tak Bruno Guimaraes hian Newcastle tan inelna hrang hrangah vawi 195 khela goal 31 thun tawh a, season liam ta khan an club top-scorer a ni. An player pawimawh a nih vangin season liam taah EPL-a 12-na Newcastle hian Guimaraes hi an ui hle a. An player langsar Sandro Tonali leh Anthony Gordon te an chhuah tawh bawk si vangin Guimaraes tal hi chu chelh hram an duh. Chelh duh viau mah se player berin chhuah an duh si chuan club tan dan ngawt a har ve thung.
Tarlan tawh angin Guimaraes hian Arsenal zawm a lo duh sa bakah an head coach Eddie Howe chuan rin lawk loh takin a hna a bansan thut a, St James Park a chhuahsan. Eddie Howe a chhuah leh bawk si vangin Guimaraes tan chhuak turin kawng zau zawk a inhawng anga ngaih a ni. A chhuak thei a nih chuan EPL champion Arenal a zawm ngei a beiseiawm.
Gumaraes an la lut thei a nih chuan muallaiah Declan Rice, Martin Odegaard leh Bruno Guimaraes te an inkawp thei dawn. Gunners hian Vinicius Junior lak tumin hma an la mek bawk a, an duh anga an squad an thuamchak thei a nih chuan champion nawn leh turin an dinhmun a tha khawp ang.
Arsenal in Guimaraes an dawr
