Arsenal leh Chelsea an chak

Inrinni zana English Premier League khelhah London club lian Arsenal leh Chelsea in hnehna an chang a, table-ah an inum chhunzawm zel. Inrinni zan hian Brighton leh Wolves in hnehna an chang ve bawk.
An match hnuhnunga result nei tha lo Arsenal hian an muala Nottingham Forrest an mikhual a. Season thara khel tha tak Nottingham Forrest lakah hian 3-0 in hnehna an chang a, awlsam takin point thum an hmu.
Aesenal hian an mualah bul an tan tha a, goal pawh an thun har lo. Inkhel tan atanga minute 15-na lekah fuh taka a khalh kual hnuin Bukayo Saka chuan mawi zetin a pet goal a, hmahruaina goal a thun. Hma takah goal an thun vangin an phur a, an khel tha zui viau bawk. Khel tha zui viau mah se chawlhlawk hmain goal an thun belh thei lova, 1-0 a hmahruai chungin chawlhlawk an hmang.
Chawlhlawk hnu lamah Gunners an khel tha chhunzawm a, goal an thun leh thuai. Minute 52-na lekah Thomas Partey chuan pui zetin box pawn atangin a pet goal a, an goal hnihna a thun. Si hniha an hnufual hnu pawhin Nottingham Forrest hian awmze nei leh hlauhawm siam khawpin Arsenal an nawr thei chuang lo. Goal lut a awm belh theih loh reng hnuin hun tawp dawn hnaiah Arsenal in goal an thun belh leh ta nge nge. EPL khel thei naupang ber record siamtu Ethan Nwaneri chuan Sterling siam tha tak chu near post-ah rang zetin a pet goal a, an goal thumna a thun. Nwaneri goal thun hnu hian goal dang a luh belh thei tawh lova, Arsenal in an mualah awlsam taka changin point thum an hmu.
Nottingham Forrest sawptu Arsenal hian khelh 12 atangin point 22 an hmu a, palinaah an awm chhunzawm. An chung chiaha awm Chelsea nen an point hmuh zat a inang a, pahnihna City nen an inkarah point khat chauh a tla zep mek bawk. Arsenal laka an tlawm vangin Nottingham in hma an sawn thei rih lova, khelh 12 atanga point 19 hmuin pa sarihna an luah chhunzawm.
Inrinni zana inkhel dangah Chelsea chuan 2-1 in Leicester City an hneh a, pathumna an luah chhunzawm.
King Power Stadium-a lenglut Chelsea tan hian Nicolas Jackson chuan minute 15-naah hmahruaina goal a thun. Jackson goal thun hmangin hun rei tak hma an hruai a, goal lut a awm belh thei lo reng. Hun rei tak chhung goal lut a awm belh theih loh hnuin Enzo Fernández chuan minute 75-naah Chelsea goal hnihna a thun a, an hmahruaina a tizau. Si hniha an hnufual hnuin mualneitu Leicester City tan Jordan Ayew chuan minute 90’+5-naah penalty atangin an si phurh a sut then. Goal an thun vangin phur viau mah se Foxes hian an si phurh an sut zo thei lova an mualah an tlawm zui ta a ni.
Leicester City hnehtu Chelsea hi season tharah an khel tha rih viau a, khelh 12 atanga point 22 hmuin pathumna an ni mek. Hetihlai hian Leicester City hian table hnuai lam an luah chhunzawm ve thung.
Team lian Arsenal leh Chelsea an chak laiin season thara bul tan tha lo, relegation zone-a awm reng Wolves chuan Fulham mualah 4-1 in hnehna an chang nawlh a, point thum hlu tak an hmu. Wolves hian mualneitu Fulham lakah goal chhuah hmasa zet mah se Matheus Cunha goal hnih leh João Gomes leh Goncalo Guedes te goal khat ve thun hmangin hnehna an chang let a, Craven Cottage-ah 4-1 in an chak. Fulham lakah an chak vangin Wolves hian relegation zone an chhuahsan nghal.