Arsenal leh Liverpool an inhnehtawk

Pathianni zana inkhel ngaihven hlawh takah pahnihnaa awm mek Liverpool leh pathumnaa awm mek Arsenal te chu 2-2 in an inhnehtawk. Arsenal leh Liverpool te an inhnehtawk laiin Chelsea chuan an mikhual Newcastle United an hneh ve thung.
Liverpool an vannei
Season thara khel tha pahnih, table chung lama awm Arsenal leh Liverpool te hian Emirates Stadium-ah inkhel hmuhnawm an lantir. Mualneitu Arsenal in tum vawi hnih ngawt an hmahruaina an humhim zo lova, penalty an beisei thlawn bakah hun tawp dawna an goal thun chu mak tak maiin hnawlsak an ni bawk. Manchester City lehpel leh tura chak mamawh Liverpool hi tlawm an pumpelh vangin an vannei hle.
Arsenal hian an mikhual team lian lakah bul an tan tha viau a, inkhel tan atanga minute kuana lekah Bukayo Saka chuan fuh zetin a pet goal a, hmahruaina goal a thun. Saka hian EPL-ah goal 50 a thun tling chiah a, mel lung thar a phun. Hma takah goal thun mah se Arsenal an him rei thei bik lo. Goal an chhuah atanga minute 9 hnu lekah captain Virgil van Dijk chuan Trent Alexander-Arnold cross tha tak, Luiz Diaz tauh pial leh chhawng chu hnaite atangin a tauh goal a, an si phuth a sut.
Hma takah goal an thun ve ve hian inkhel a tihmuhnawm zual sauh a, inkhel boruak pawh a tang tha at at viau. Goal lut a awm belh theih loh reng hnuin chawlhlawk dawn hnaih minute 43-naah Arsenal player thar Mikel Merino chuan fuh zetin a tauh goal a, hma an hruai nawn lehna goal a thun. Merino goal thun hmang hian Gunners in 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, goal khat hmuh tur a awm belh leh. Second half tir lamah Arsenal defender pawimawh Gabriel chu hliam vangin lakchhuah a ni. Gunners hian hrem vangin an defender pawimawh William Saliba an chhawr thei lova, Saliba kawppui fuh tak Gabriel a inhliam leh zel vangin an tlarhnung a pan ta hle. An hmahruaina humhim tumin tan khawh nasa viau mah se Arsenal hian hun tawp dawn hnaiah an khingpuite nawr let an dawl lova, goal an chhuah. Reds hian fuh taka an nawr tlang hnuin Darwin Nunez chuan Mohamed Salah tan fuh zetin ball a chhawp sak a. Aigupta tlangval Salah hian minute 81-naah David Raya dan rual lohin a pet goal a, an si phurh a sut.
2-2 a nih hnuin Arsenal in an mualah chak ngei tumin tan an khawh zui a, vanneihthlak ang reng takin goal an thun. Gabriel Jesus goal thun hi mak tak maiin hnawl a ni a, goal an thun theih nana thawhhlawk tak Kai Havertz chu handball angin first referee Anthony Taylor chuan a hmu teh tlat a, Arsenal goal thun pawmsak an ni lo. Penalty ngei tura ngaih pek an nih loh vang leh mak tak maia an goal thun hnawl a nih vangin Arsenal an lawm lo hle a. Arsenal lungchhiatna hi Liverpool tan vanneihna a ni ve thung.
An mualah an chak zawh loh vangin Arsenal hian khelh 9 atangin point 18 an hmu a, pathumnaah an awm chhunzawm. Arsenal lakah vanneihthlak taka tlawm pumpelh Liverpool hian khelh 9 atangin point 22 an hmu a, point 23 hmu tawh Manchester City lakah an hmahruaina an hloh fel thung.
Chelsea an chak
Pathianni zana inkhel dangah London club lian Chelsea chuan 2-1 in an mikhual Newcastle United an hneh a, pathumnaah an inhlangkai.
Stamford Bridge-a an mikhual Newcastle United an hneh tum hian Chelsea tan Cole Palmer a khel tha hle a, pui zeta assist a neih bakah tawih zetin chakna goal a thun bawk. Chelsea hian Palmer ball pek fing leh tha zet vangin an mikhualte a nawr tlang a, Nicolas Jackson chuan minute 18-na lekah awlsam takin hmahruaina goal a thun. Team lian lakah goal chhuah hmasa zawkah tang mah se Newcastle hian fuh zetin an khingpuite an nawr tlang a, Alexander Isak chuan hnaite atanga pet goal in, minute 32-naah an si phurh a sut.
Chawlhlawk hmain inhnehtawk bawk mah se second half tan tirh teah Cole Palmer chuan pui zetin lei hrulah a pet goal a, hma an hruai nawn lehna goal a thun. Palmer goal thun hi hun tawp thlengin venghim a, an mualah point thum hlu tak an hmu. Chelsea hi season tharah an khel tha riah viau a, khelh 9 atanga point 17 hmuin palinaah an inhlangkai. Newcastle hian khelh 9 atangin point 12 an hmu ve mek bawk.