Arsenal leh Newcastle te an chak

October ni 1, Nilai zan khan UEFA Champions League – League phase khelh chhunzawm a ni a, EPL club lian Arsenal chu an mualah an chak. Arsenal chak rualin Newcastle United pawhin Mimualah hnehna an chang ve bawk.
Martinelli a vul
Season thara squad chhah leh zual tak Arsenal chuan an mual; Emirates Stadium-ah Greek club lian Olympiakos an mikhual. Player thar tha tak tak an neih belh vanga season thara bul tan phak ta mang lo Gabriel Martinelli a vul nawn leh a, goal khat a thun. Brazil forward Martinelli hian elpui hautak neih a ngeih a, season dang zawng aiin goal a thun thei a, team tan mamawh chhanna a ni leh zual.
Emirates Stadium-ah Arsenal in chak ngei tumin tan an khawh a, an mikhualte an nawr nasa nghal hle. Beiseina sang tak nena an lak luh Viktor Gyokeres chuan inkhel tir lamah goal a thun nghal teuh hle. Gyokeres shot tha zet mai chu si nghak Konstantinos Tzolakis chuan a dang per hman hlauh a, a per hian goal post a per dawp. Goal post atanga per let leh hi Martinelli chuan harsa lo takin goal-ah a chantir a, minute 12-na lekah hmahruaina goal a thun.
Arsenal hmahruaina goal thuntu Martinelli hian Champions League 2025-26 a an hmachhawn hmasak ber Athletic Club lakah Arsenal hi alo chakpui tawh a. EPL-ah Manchester City laka an tlawm tur a chhan him zui leh zat bawk. Season tharah a bul tan phak lo zeuh zeuh mah se team tan a pawimawh ta zawk emaw tih tur a ni hlauh a, hun pawimawhah goal a thun a thun thei a, assist a nei thei viau bawk.
Goal an chhuah hnuin Olympiakos an khel tha zui viau a, an si phurh an sut teuh thei hle. Daniel Podence shot tha zet mai chu Gunners si nghak David Raya chuan pui zetin a lo dang hman hlauh a, team a chhanhim. Hei bakah hian Francisco Chiquinho goal thun chu offside vangin hnawl a ni bawk a, Arsenal an vanneih laiin Olympiakos an vanduai ve thung.
Inkhel hmuhnawm takah goal a luh belh thei loh reng hnuin hun tawp dawn hnaihah Bukayo Saka a inlar a, an chakna nem nghet turin goal a thun. Arsenal in contract thar tha zawk ziahpui tuma an dawr mek Saka hian minute 90+2-ah an goal hnihna a thun a, an hnahruaina a tizau. Saka goal thun hnuin goal dang a luh belh thei tawh lova, Arsenal in an mualah si hnih faiin hnehna an chang a, point thum an hmuh belh.
UEFA Champions League 2025-26-ah Arsenal an khel tha chhunzawm a, vawi hnih an chak zawn tawh. UCL 2025-26 League Phase-ah vawi hnih chak zawn thei team paruk an awm mek a. Point 6 hmu team ruk zingah Gunners hian pangana an luah mek. Pathianni zan khan Arsenal hian inkhel hautak tak an hmachhawn a, St James Park-a champions League khel ve tho Newcastle United hmachhawnin 2-1 in an chak. Manager Mikel Arteta chuan Newcastle hmachhawn team atangin player paruk ngawt a thlak danglam a. Squad siksawi nasa viau mah se Olympiakos lakah hnehna an la chang tho thung. Hei hi Arsenal squad chhahzia tilang fiah leh zualtu a ni.
Newcastle an chak awlsam
Nilai zana inkhel dangah EPL club Newcastle United chuan Belgium-a an zinchhuahnaah awlsam takin hnehna an chang a, an khingpui Union St.-Gilloise chu 4-0 ngawta sawpin UCL season tharah a vawi khat nan an chak.
Newcastle hian an len luhna mual Lotto Park-ah mualneitu Union St.-Gilloise an ngam viau a, goal pawh an thun har lo. Arsenal lakah an hmahruaina goal thuntu forward palian leh huaisen Nick Woltemade chuan minute 17-naah hmahruaina goal a thun. Hmahruaina goal an thun hnuin Magpies an khel tha chhunzawm a, chawlhlawk hmain goal khat an thun belh leh. Newcastle hian chawlhlawk dawn hnaih minute 43-naah penalty an hmu. He penalty hi Anthony Gordon chuan harsa lo takin a pet goal a, an goal hnihna a thun a, si hnih faia hmahruai chungin chawlhlawk an hmang.
Chawlhlawk hnu lamah Newcastle an khel tha chhunzawm a, goal hnih an thun belh leh. Magpies hian penalty an hmu nawn leh a, an penalty vawi hnihna hi Anthony Gordon bawkin a pet goal nawn leh a, minute 64-naah an goal thumna a thun. Goal lut a han deuh hnuin Harvey Barnes chuan minute 80-naah an goal lina a thun zui leh a, a tawp a khar zui ta a ni.
Union St.-Gilloise sawptu Newcastle United hian khelh hnihna atanga point thum hmuin table chung lam hret 11-na an luah. 4-0 ngawta an hneh Belgian club Union St.-Gilloise khan khelh hnih atanga point thum hmuin 20-na an luah ve dawrh thung.