Brazil forward Vinicius Junior chuan contract thar ziakin Real Madrid-ah cham chhunzawm a rilruk a, lak tuma ngaihventu Arsenal nen an inkar a hla rih hle.
English Premier League (EPL) champion Arsenal chuan manto takin player langsar Vinicius Junior lak an huam a. Player hlawha insenso uchuak ngai lo tak Gunners hian an club chanchina an player hlawh hnem ni turin Vinicius Junior hi lak an huam hial nghe nghe. Real Madrid ah kum khat daih chauh contract a neih tawh vangin Vini hian khawvela tualchhung league ropui ber EPL a pan duh mai rinna lian tak a awm.
Arsenal in lak tumin hel mek bawk mah se Real Madrid manager thar Jose Mourinho chuan Vini hi kawl chhunzawm ngei a duh a. An club thuneitute hnenah pawh player hrawl kawl zui an mamawh thu a hrilh nghe nghe. Manager in kawl chhunzawm a duh vangin Real Madrid pawh hian kum 26 mi Vinicius Junior hi contract thar pek tumin an inruahman chuk chuk bawk.
Ball thiam, che rang leh ngeiawm tel ve thin bawk Vinicius Junior hian kum khatah £12m – £15m vel bawr a hlawh mek a. Santiago Bernabeu-ah contract thar ziaka a cham chhunzawm dawn a nih chuan Kylian Mbappe hlawh zat hlawh a, kum khatah £25m hlawh ve a duh. A hlawh phut zat hi a sang thawkhat viau a, Real Madrid nen hian an inrem thei kher lo thei bawk. Club nen an inrem thei lova, Mbappe hlawh zat a hlawh phak dawn loh chuan Santiago Bernabeu chhuahsan a hnial lo mai thei bawk. Hlawh chungchangah an inrem thei lo a nih chuan Arsenal tan lawmna a nih a rinawm.
EPL champion Arsenal hian an wingwe Leandro Trossard chu Besiktas hnenah an hralh tawh a, a hmunruak luah turin Christos Tzolis an la lut tawh. Tzolis la lut tawh mah se winger hming langsar zawk lak tur an la dap mek a, tun dinhmuna an duh ber chu Vinicius Junior hi a ni. Sky Sport in a tarlan danin Vini hian Arsenal zawm aiin Real Madrid a cham chhunzawm a tum ta zawk. Heti a nih vang hian Gunners hian player dang lak tur an dap zui a ngaih hmel.
Arsenal in lak tuma an hel zingah Spain leh Athletic Club winger Nico Williams a tel. Kum 23 mi Williams hi Arsenal manager Mikel Arteta player duh chi tak mai a ni a, lak tumin an lo ngaihven tawh thin nghe nghe. Vinicius Junior an la thei lo a nih pawhin Nico Williams an la thei a nih chuan Gunners hian an hlawkpui viau thoin a rinawm. An nunchang leh an kum enin Arsenal tantu tam tak chuan Vinicius Junior ai chuan Nico Williams hi an duh zawk hial mai thei bawk.
EPL champion Arsenal hian Argentina leh Atletico Madrid forward Julian Alvarev an awt viau bawk. Alvarez manah hian sum hlawm lian sen bakah an striker Viktor Gyokeres pel tel an huam hial niin tarlan a ni. Atletico Madrid leh Arsenal hi chuan inremna an nei thei mai dawn niin a lang a. Alvarez hian EPL a kir leh ai chuan La Liga champion FC Barcelona zawk a chak zawk thung a. Barcelona a zawm lo a nih chuan Arsenal hian an lak luh ngei a rinawm.
Football bazarah chuan inremna neih leh inrem tak lohna kar hi tin ther tiat let a ni a, a inkar a zim em em! Arsenal leh Vinicius Junior te inkar hi hla thar leh duai angin lang bawk mah se he thu i chhiar lai mek pawh hian an lo inhnaih leh viau thut thei a. An inkar a lo zau leh zual sauh thei tho bawk. Bazarah chuan thil thleng thei apui a tam a, nghah peih a ngai a, dawhtheihte pawh a ngai tel ve thin bawk. Lo thlir zel phawt mai ang u.
Arsenal leh Vinicius Junior kar a hla
