Zain dar 11:15 atangin UEFA Champions League last 16 first leg khelh chhunzawm a ni leh dawn a, English club lian Arsenal. Manchester City leh Chelsea te an inlan hlawm dawn. Santiago Bernabeu-a Real Madrid leh Manchester City te inkhel tur chu inkhel ngaihven hlawh ber a ni ang dawn. Zanin hi football ngainatute tan men rei zan a ni ang.
Leverkusen mualah Arsenal
Champions League 2025-26-a league round-ah an khingpuite hneh vek Arsenal chuan German club Bayer Leverkusen an hmachhawn dawn a, hnehna chan ngei tumin BayArena -ah an lenglut dawn. Mimualah hnehna an chang thei a nih chuan an mualah hahdam zawkin an inlan thei dawn a, Gunners hian chak an tum hle ngei ang.
Arsenal hian Pathianni zan khan FC Cup last 16-ah Mansfield Town an hmachhawn a, 2-1 a chakin quarter-final a lut. Mansfield an hmachhawn tum hian an player tha rualte an awltir thei a. Leverkusen lakah hian thothang tha zawkin an inlan thei dawn tihna a ni. Hetihlai hian Leverkusen hian inrinni zan khan Bundesliga-ah inkhel harsa tak an hmachhawn a, SC Freiburg nen 3-3 in an inhnehtawk thung. Heti a nih vang hian Leverkusen hi an chau zawk dawn a, Arsenal lakah tlawm an pumpelh thei a nih chuan result tha a ni ang.
Bernabeu-ah Manchester City
EPL-ah pahnihna luah mektu Manchester City chu Spanish La Liga-ah pahnihna ni mek Real Madrid hmachhawn turin Santiago Bernabeu-ah an lenglut dawn. Mikhual an nihna hmunah an chak thei a nih chuan City hian quarter-final an hnaih zual sauh ang.
Real Madrid leh Manchester City hi tunhnaiah an intum thei viau a, hneh pawh an inhnehtawk thei hle. 2021/22 khan semi-final-ah an intum a, Mak tak maiin Real Madrid in hnehna an chang let a, final lutin an champion zui nghe nghe. 2015/16 semi-final-ah pawh City hi an lo hnawtchhuak tawh bawk. 2022/23 season khan semi-final-ah an inhmachhawn zui leh a, 5-1 a chak City in final an lut a, an champion zui ve leh bawk. City hian 2019.20 season khan Real Madrid hi last 16 atangin an lo hnawtchhuak ve tawh bawk a. 2012/13 khan group stage-ah an inhmachhawn a, vawi khat ve ve an chak. Intum tawk thei tak an nih vangin zaninah pawh inkhel hmuhnawm an lantir leh ngei a rinawm.
Real Madrid player pawimawh pahnih Kylian Mbappe leh Jude Bellingham te hliam vangin an inlan theih hmel loh a. City lakah anni pahnih chhawr theih loh hi ch^nna nasa tak a ni ngei dawn.
Ddar 1:30-ah vek hian champion lai PSG in Chelsea an mikhual ve dawn bawk.
Arsenal, Manchester City leh Chelsea te inlan zan
