Arsenal chuan an player pawimawh Bukayo Saka chu kum nga daih contract thar ziahpui tumin an dawr a. Saka hi contract thar a ziak a nih chuan Arsenal player zinga hlawh hnem ber a ni dawn.
Arsenal chuan an player pawimawh Saka hi kum 20231 thleng an hnena cham turin an dawr a, an indawr hun chhung pawh a rei thawkhat tawh viau. Rei tak an indawr hnuin Saka pawh hian a thuphung chuan contract thar ziah hi a remti tawh niin tarlan a ni. Kum 2027-a contract hmang zo tur Saka hian contract thar a ziak a nih chuan chawlhkar khatah £300,000 a hlawh phak tawh dawn.
Saka hian kum 2018 khan kum 17 mi a nih laiin Arsenal tan a khel tan a, inelna hrang hrangah vawi 217 khel tawhin goal 57 a thun tling tawh. English Premier League-ah vawi 116 khel thawhin club player pawimawh a ni. Club tan a khelh that ang bawkin ram tan pawh a khel tha viau thin bawk. England tan hian vawi 48 khelin goal 14 a thun tling tawh. Thomas Tuchel enkawl England tan World Cup-ah hmun pawimawh a chan chhunzawm ngei tura ngaih a ni bawk.
Arsenal hian an player pawimawh thun ngheh hna an thawk chho mek a, William Saliba, Gabriel Magalhaes, Ethan Nwaneri leh Myles Lewis-Skelly te contract an ziah felpui tawh a, Saka an thlun nghet thuai dawn niin a lang bawk.
Hun rei tak chhung champion na nei tawh lo Arsenal hian trophy lak ngei tumin tan a khawh a, EPL-ah point liin an sang fal mek. Carabao Cup-ah final an lut tawh a, FA Cup-ah fifth round lut tawhin Champions League-ah champion ngei tumin tan an khawh mek bawk.
Arsenal player hlawh hnem ber tur Bukayo Saka
