Asia khawmualpui huapa ram leh hnam hrang hrang aiawh kalkhawmnaah Mizoram buai laia bomb hmanga beih a nih thu India national media-ten an ziahlan loh thu Mizo journalist-in a sawichhuak.
Asia ram pasariha chanchinbumite telna, Asia Indigenous Peoples Pact (AIPP) Communications Programme hnuaia Indigenous Voices in Asia Network (IVAN) Regional Exchange chu August 25 atang khan Chiang Mai Thailand-ah neih a ni a. Thlirna hrang hrang atanga ram hrang hranga tualchhung media-te dinhmun leh hmalam hun zirho a ni a. Asia rama chanchinbumi kalkhawmte hian an tualchhung media theuh chanchin leh an harsatna tawh te, hmasawn dan tur te an sawiho.
Heta tel ve Mizoram Journalists’ Association member Lalnunkimi Colney chuan India-in Mizoram a bomb chungchang India rama chanchinbuten report engmah an ziahloh thu a sawi a. Vawiin thlenga zau taka mi tam zawk hnena Mizoram leh India ram hmarchhak state-te tana aw chhuah a la harsat reng thute a sawi. Tualchhung chanchinbumite chu khawtualmite tana aw chhuahtu satliah mai niloin, tualchhung mipuiin hun harsa an tawha thudik haichhuah sak a, zau zawka an dikna chanvo pholan sak tura an beisei berte an ni, tih te a sawi bawk.
AIPP hnuaia IVAN hi kum 2013 khan Asia khawmualpuia indigenous journalist, non-indigenous journalist leh indigenous rights activist ten inrem taka thawhhona tha an neih theihna tura din a ni a. Media zalenna leh indigenous mite humhalh leh chawilar chu he pawlin a tum ber a ni.
Asia huap intawhkhawmah Mizo journalist-in Zoram bomb sawi
