India gold medal beiseina pakhat han tih ve theih mai tur HS Prannoy chuan nimin khan Hangzhou khawpuia Asian Games badminton tournament mipa singles semi-final match pakhat zawkah All England champion lai Chinese Li Shi Feng chu straight games hmanga hneh loin bronze medal a awrh a, a beisei ber gold hlawh-chhuak zo ta lo mah se kum 41 chhunga Asian Games badminton men’s singles-a India medal lak hmasakber a ni zui ta tho.
He inelna huangah hian India tan gold beiseina kan han sawiri bawk tak nain Asia khaw-mualpui hi khawvela badminton player thiam ber berte awm-khawmna kumhlun a nih avangin a chunga tarlan tawh ang khian kum 40 chuang zet chu India hian mipa singles huangah phei chuan Asian games medal a hawn ngai lo a, kumin pawh hian bronze medal hi result lawmawm tiin a sawi theih ang!
World No 7 Indian hian last four match-ah unforced error a ngah a, minute 51 lek chhungin world No. 8 Li lakah 16-21, 9-21-in a tlawm hman!
Final lut zo ta lo mah se kum 1982 daih tawha New Delhi khawpuiin Asian Games a thlen tuma semi-final lo khel ve tawh Syed Modi hnu lam men’s singles-a India medal lak leh vawikhatna a ni zui ta tho.
Prannoy hian karliamta mai khan team inelna lamah Indian men’s team chu silver medal a lo lakpui tawh bawk.
Kum 31-a upa Thiruvanan-thapuram tuiliak Prannoy ruala India medal beiseina dang PV Sindhu erawh Ningani khan Asian Games women’s singles quarter-final paltlang zo loin a tla thung.
2014 Incheon (bronze medal) leh 2018 Jakarta Asian Games (silver)-a India tana medal lo hlapchhuak tawh Indian shuttler Sindhu hian ram tan pawh Olympic medal pahnih hawn tawhin, kumin Hangzhou Games-ah pawh India gold beiseina lian pakhat a ni a, mahse, women’s singles quarter-final paltlang zo loin a thlengtu ram player He Bingjiao lakah straight games hmangin a tlawm!
World ranking-a 15-na luah mektu Sindhu hi minute 47 lek chhungin world number five Bingjiao lakah 16-21, 12-21-in a chak lo a, Tokyo Olympics-a straight games hmang bawka a hneh loh Sindhu lakah Olympic bronze medal a hloh phahna phuba a la ve ta a ni.
Asian Games badminton semi-final paltlang zo lo Prannoy kutah bronze
