Asian Games 2026 zawh taka gold medalist pahnih – Indian hockey player Lalremsiami leh Lalthantluangi chu ruahman ang chuan vawiin – Thawhtanni hian Mizoram an rawn thleng dawn a. State sawrkar chuan ropui taka lo hmuah tumin a inbuatsaih.
Sports & Youth Services minister Lalnghinglova Hmar hoa Mizo nula pahnih lo hmuah dan tur hi a kaihhnawih sawrkar hotute leh pawl aiawhten an rel a. Lengpui Airport-a lo hmuah bakah a lawmna pui ber R Dengthuama Hall Mualpui Salem Vengah chawhnu dar 3.00 ah chief minister Lalduhoma hoin neih tura rel a ni. Lawmna hunah hian mipui a duh apiang tel turin sawrkar chuan a sawm.
Lengpui Airport-ah Assembly deputy speaker Lalfamkima hoin sawrkar leh sports association, Mizoram Olympic Association, United Sports Association of Mizoram leh Hockey Mizoram aiawhten an lo hmuak anga, airport atangin chawhnu dar 1.30 vela rawn chhuakin, Hunthar peng atangin Chanmari lamah an kual chho anga, Treasury Square atanga Republic Veng leh ITI Veng kaltlangin R Dengthuama Hall an pan dawn a ni. Hemi paltlang kawngdunga mipui awm chu an awmhmun theuhah Lalremsiami leh Lalthantluangi te lawmna lo lantir turin ngen an ni.
Sports minister chuan, Lalremsiami leh Lalthantluangi chu Mizo zinga Asian Games-a gold medal mai ni lo, medal hrim hrim la hmasaber an nih avangin thil hlu bik a ni a, sawrkar pawhin a ngaihlu a, ropui taka lo hmuaha lawmpui a duh tih a sawi a. An champion piahlamah Olympic 2028 khel tura an tlin nghal avangin a hlu lehzual tih sawiin, Sports Incentive Cash Award Scheme hnuaiah cheng nuai 25 ve ve dawng tur an ni tih a sawi bawk.
October ni 2 khan Asian Games hmeichhe hockey final-ah Remsiami vuak goal hmangin India-in si khat faiin China an hneh a, 1982 hnua Asian Games hmeichhe hockey-a India a champion leh hmasak ber a ni. India team-a tel Mizo nula pahnih, Lalremsiami Hmar Zote leh Lalthantluangi te’n gold medal an dawng.
Asian Games gold medalist 2 Aizawlah kawng zawhpui dawn
