Assam-ah Congress-in CM candidate nei dawn lo

Assam-ah Congress-in CM candidate nei dawn lo
Congress chuan nakuma Assam assembly inthlan lo awm turah chief minister atana zawrh sa an nei dawn lo va, Ningani khan inthlan tur chungchangah hian an Thukhawm.
An hruaitu hlun, Lok Sabha-a Leader of the Opposition Rahul Gandhi-a thachhangdawltu, Gaurav Gogoi-a chuan inthlan lo awm turah hian ‘Assam mipuite’ chu an party hmatheh tur an nih thu NDTV hnenah a sawi.
“Assam mipuite hian inthlak an duh a, anni hi kan hmatheh turte chu an ni. Assam mipuite hian muanna leh nun pangngai an duh avangin Congress lam hi an tang a ni,” tiin hmarchhaka BJP rorelna state hi ‘ramhnuai lal’ ang mai a nih thu a sawi.
BJP-in Assam-a kum 10 ro an rel leh an party aTanga chhuak an awm fo chungchangah Gogoi-a chuan a chhan a hmuh chian thu a sawi.
Assam chief minister hriat hlawh ber pakhat, Tarun Gogoi-a fapa chuan, “Inthlak danglamna kan duh avangin kan pumkhat a ni,” a ti a. A pa hi chief minister ni rei ber niin term thum chhung, kum 2001 aTanga 2016 thleng ro a rel.
Ningania Assam-a Congress hruaitu lawk Thukhawm chuan nakuma an state inthlan tura hmalak dan tur an sawiho va, party chief Mallikarjun Kharge leh Gandhi-a pawh an tel.
Gogoi-a chuan, “Nakumah hian state hrang hrang an inthlang dawn a, state hruaitute Delhi-ah kovin Assam mipuite nghawng thil chi hrang hrang ngun taka zawha zir zel a ni a. Kharge, Gandhi, KC Venugopal leh hruaitu dangte pawhin ngun takin an ngaithlain mipui rorelna hum zel kan duh avangin nakum inthlana kan chak theih dan tur an hrilhin an ngaihtuah a ni,” a ti.
Kharge-a pawhin, “Kum lo awm leh turah chuan Assam mipuiin eiru, mi then darh leh phuba latu sorkar an paih thla dawn a. Assam mipui vaibelchhe 3.5 hian Congress lam hawiin inthlak an duh a ni,” tiin X-ah a tar lang.
Assam-ah hian inthlan thlir chungin Congress chuan BJP kaihhruai sorkar chu ei ru-ah an puh nasa tawh hle a. Chief Minister Himanta Biswa Sarma-a pawhin Gogoi-a nupui chu Pakistan leh ISI nen inzawmna neiah puhin Congress chuan an pha a, nasa taka Gogoi-a’n a beihna a tihletna mai niin an sawi.