Assam-a tui lian mek chuan ziaawm lam pan hret mah se dinhmun a inthlak reng a, mi pahnih thi awm belh leh tawhin kumin chhunga thi chu mi 100 an tling ta.
Pathianni khan Golaghat leh Karbi Anglong district-ah tui lianin mi pakhat ve ve lain an thi niin Assam State Disaster Management Authority (ASDMA) chuan ni tin bulettin a tihchhuah thinah a tar lang.
Charaideo, Darrang, Golaghat, Jorhat, Karbi Anglong, Nagaon leh Sivasagar district-ah te tui lian hi mi 1,37,500 chuangin an la tuar mek.
Golaghat chu a tuar na ber district an ni a, mi 70,000 dawnin harsatna tawh phahin Sivasagar-ah mi 40,000 vel leh Jorhat-ah mi 16,000 chuanin an buai phah mek bawk.
Assam tui lian hi Inrinni atang khan ziaawm lam a pan hret a, hetih lai hian district pariat tibuaiin mi nuai 1.5 dawnin harsatna an tawh phah a ni.
Thuneitute chuan district parukah relief camp leh relief distribution centre 125 siamin mi 49,061 an khawsa mek niin ASDMA chuan a tar lang.
Ni khat liam ta chhungin tui lian vanga in leh lo chhuahsana relief camp-a awmte tan thuneituten buhfai quintal 710.44, dal quintal 127.85, chi quintal 38.34 leh tel litre 3,773.7 an sem tih an sawi.
Tui hian khaw 456 a la chim mek a, thlai chinna hmun hectare 11,933.46-a zau a tichhe tawh bawk tih ASDMA chuan a tar lang.
Tui lian hian district eng emaw zatah lui kam lei tha, kawng, lei leh thil dang tam tak a tichhe bawk.
Dhansiri chu Golaghat-a h leh Sribhumi chu Numaligarh leh Kushiyara-ah hlauhawm chin chhinchhiahna chung lamah a la luang niin ASDMA chuan a tar lang.
Tui lian hian ran leh ar vulh 43,331 vel tibuaiin thi tam tak an awm tawh bawk.
Assam tui lianah mi 100 thi tling tawh
