Mizoram Legislative Assembly Speaker chuan thla kalta August ni 27&28 Assembly Session-a ‘zawhna chhan loh a tam’ tih leh’ zawhna chhang tlai’ tih opposition member thenkhatin an auchhuahpui leh, sawifiah tul a tih thenkhat chu press conference meuh neiin nimin khan a sawifiah a.
Speaker hian zawhna chhan loh chungchangah sawrkar kal tawhte hun laia thil thlen dan data rawn tarlangin, Congress hun (7th Assembly) laiin zawhna chhan loh 23 a awm thu te, MNF hun (8th Assembly) laiin zawhna chhan loh 180 a awm thu leh, tuna sawrkar mek (ZPM) hun hman mekah zawhna chhan loh pathum a awm tawh thu te a ni.
Heta report kan neih atanga lo lang ta chu, MNF hun laiin zawhna chhan loh a tam ber a, Congress nen a inthlau hle a. Tuna sawrkar mek kum hnih la tling lo deuhah a la tlem ber a; term khat hmang zo turin kum thum tha a la awm a, eng nge an án chhoh zel dawn hriat a ni lo.
Assembly kaltlanga MLA te zawhna chhangtu sawrkar department lam hian eng vanga chhang hman lo thin nge an nih? tih hi zawhna lian tak a ni a. Zawhna zawttuten zawhna an thehluh theih hun bituk atanga chhiara ni 15 zet chhung chu zawhna chhanna hun thawl tha a awm tihna a ni a. Aizawl Secretariat atanga chhanna awm mai thei lo, district dang atanga chhanna lakkhawm ngai pawh lo ni teh reng se, sawrkar activities reng reng record fel tak awm sa tura ngaih a ni a, chumi han phuah khawm (compose) chhung chu hun rei tak ngai lo tura ngaih a ni.
Tun laiah digital era-ah kan awm tawh kan ti a, khawl changkang leh man to pui pui office-ah kan hung ngir khep khup tawh a, chhawr tangkai kan la tum lo nge, kan rula raw neih ve mai mai nge, computer mouse leh monitor inkar hi ni tam tak thangna khawpa hla te a nih zel chuan, eng tin nge ni ta ang?
A chang chuan RTI hmanga information pek chhuah leh, kha information hmanga Assembly-a zawhna lut chhanna inang lo te pawh a awm thin nia sawi a awm fo mai te pawh hian, department lamin rigid record an neih that tawk lohzia a lantir a ni mai lawm ni a tih theih awm e.
Hetiang thila sawrkar mualphona a awm hian, sawrkar hnathawkte leh a enkawltu ministry chelhtute inthlahdah dan hi a inchen deuh rengin a rinawm.
Assembly zawhna chhan loh chungchang
