Tunhnaiah sawrkarin a nghet loa lak dah ngheh leh a ngheta a thar lak assistant professor 264 a nei tih Higher & Technical Education minister Dr Vanlalthlana chuan a sawi.
Zirtawpni khan minister ho hian Higher & Technical Education department hmalakna thlirletin H&TE Secretariat, Directorate, Joint Directorate (Technical), PM-USHA, Mizoram Scholarship Board, College Principals’ Council, Polytechnic, MERC working chairman Prof. Lalbiakdiki Hnamte leh member dangte atangin an hmalakna leh an dinhmun theuh ngaihthlak a ni a; hmachhawp awm leh hmalak dan tur sawiho a ni.
Higher education tan theihtawp chhuah a ni tih minister hian sawiin, tunhnaiah a nghetin assistant professor 36 lak an nih bakah RUSA assistant professor 58 lak ngheh an ni a; contract assistant professor 170 dah ngheh an ni tawh tih a sawi. Heng thawktu lak belh, human resource tihchangtlun hian mihringa theihna awm chu tangkaia hman chhuahtir an tum tur a ni, tiin, human capital formation avangin zirlaite leh zirnaah sum peipun zel tur a ni tih a sawi.
Kan kal dan leh hmalakna kan thlirhoa kan ennawn hian kan chak a, chu chuan min nawr kal thin, tia sawiin, H&TE department official-te thawh ho that azarah hmasawnna duhawm tak tak Mizoram-in a hmu a, class tan theih tura Mizoram Engineering College kalpui mek a nih bakah Mizoram State University din thar pawh class kalpui a nih thuai theihnan hma lak zel a ni tih a sawi bawk.
Assistant professor 264 kan la tawh – H&TE minister
