EPL season kal mekah beisei phak baka khel tha, champion lai Manchester City leh hmahruaitu Arsenal hneh zawn thei Aston Vill an chak tluang zel. Villa hian inrinni zan khan an khingpui Brentford chu 2-1 in an hneh a, pathumnaah an insawh nghet.
Gtech Community Stadium a lenglut Aston Villa hian bul an tan tha hran lova, tlawm hlauhawmah an awm hman. Chawlhlawk hmaa si an phurh chu tam zawk an nih hnuin an sut thei chauh a. Hun tawp dawn hnaiha Ollie Watkins goal thun hmangin an chak zui ta hial a, point thum hlu tak an hmuh belh leh.
12-naa awm mek Brentford tan hian Keane Lewis-Potter chuan minute 45-naah hmahruaina goal a thun a, he goal hmang hian hun rei tak chhung hma an hruai. Hmahruaitu zawk an nih laiin an chesual a, minute 71-naah Ben Mee hnawhchhuah a ni. Tam zawk an nih vangin Aston Villa an phur thar a, na taka an khingpuite nawr nghalin, goal pawh an thun thuai. Minute 77-naah Álex Moreno chuan goal thunin an si phurh a sut.
1-1 a hnih hnuin inkhel a hmuhnawm zui viau a, tam zawk Villa in chak an tumruh hle. Huaisen taka an khingpuite nawrtu Villa hian hun tawp dawnah goal an thun belh ta nge nge. Minute 85-naah Ollie Watkins chuan Kamara siamsak atangin hma an hruai letna goal a thun. Hmahruai zawk an nih hnuin hun tawp dawn hnaih minute 90+7-ah Boubacar Kamara hnawhchhuah a ni. Player 10 ve ve an nih hnuin Brentford phur viau mah se an si phurh an sut thei tawh lova, an mualah ngei uiawm takin an tlawm zui ta a ni.
Brentford lakah an chak leh tak vangin Aston Villa hian khelh 17 atangin point 38 an hmu a, pathumnaah an awm chhunzawm. Villa hian champion thei an nihzia an lantir zui zel a, an chunga awm mek Liverpool nen an point hmuh a inzaat a. Hmahruaitu Arsenal nena an inthlauhna pawh point khat chauh a ni. EPL ah an champion em lo a nih pawhin champions league an khel phak tal a nih chuan Aston Villa tan hlawhtlina ropui a tling thoin a rinawm.
Inkhel dangah West Ham United chuan London Stadium-a an mikhual Wolves chu Mohammed Kudus goal hnih thun leh Jarrod Bowen goal khat hmangin an sawp a, an mualah awlsam takin point thum an hmu. Hammers hian khelh 17 atangin point 27 an hmu a, table-ah hma sawn hlekin, pariatnaah an inhlangkai.
Aston Villa an chak tluang
