Ningani zanah khan UEFA Europa League – Lea-gue round khelh zawh a ni ve leh a, English team pahnih Aston Villa leh Nottingham Forrest ten hnehna an chang. Aston Villa in pahnihna ni chungin last 16 an lut a. Nottingham Forrest in last 16 lut turin play-off an pal tlang hmasak zet a ngai dawn thung.
Villa in Salzburg lehthal
Europa League-ah pahnihna luah a, last 16 lut chiang tawh Aston Villa chuan an mual; Villa Park-ah RB Salzburg an mikhual. Last 16 lut chiang tawh ni mah se pakhatna ni chunga league round khar thut thei an nih vangin an muala chak ngei tumin tan an khawh. Play-off tal khelh phak beisei zui tura chak mamawh Salzburg lakah goal hnih ngawt an chhuah hmasa. Goal hnih chhuah hmasa mah se an mikhualte an lehthal a, harsa takin hnehna an chang.
Villa Park-a lenglut Salzburg hian rin phak bakin an khel tha a, Premier League-ah pathumnaa awm mek lakah goal hnih an thun hmasa. Salzburg tan hian Karim Konaté chuan minute 33-naah hmahuraina goal a thun a, he goal hmang hian 1-0 a hmahruai chungin chawlhlawk an hmang.
Chawlhlawk hnu lamah Salzburg an khel tha chhunzawm a, goal an thun leh thuai. Second half tan atanga minut lina lekah Moussa Yeo chuan an goal hnihna a thun a, an hmahruaina a tizau. Si hnih faia hma an hruai vangin point thum hmuh theih beiseina sang tak an nei.
An mikhual lakah si hnih an phurh hnuin Aston Villa an insiamtha a, goal thum ngawtin an khingpuite an chhang let. Villa tan hian Morgan Rogers chuan minute 64-naah goal thunin an si phurh a sut. Rogers goal hian Villa a fuih phur viau a, hmuhnawm zawkin an inlan chhunzawm.
An si phurh sut zawh ngei tuma tan khawh Villa tan hian Tyrone Mings chuan minute 76-naah goal thunin an si phurh a sut zo va. Hun tawp dawn hnaih minute 87-naah Jamaldeen Jimoh chuan hma an hruai letna goal a thun ta nge nge. He goal hi an chakpui a, an mualah point thum hlu tak an hmu zui ta a ni.
RB Salzburg lehthaltu Aston Villa hian khelh 8 atangin point 21 an hmu a, an mahni ang thova point 21 hmu Lyon chu goal difference-ah an tluk loh vangin pahnihnaah an awm. Villa in last 16 an luh chian laiin RB Salzburg erawh chu play-off pawh khel phak lovin an tla ve thung.
Forrest an chak awlsam
Play-off tan khel tura chak mamawh Nottingham Forrest chuan an mualah nuamsa takin hnehna an chang a, an mikhual Ferencvaros chu 4-0 ngawtin an sawp. Forrest hian an mamawh point an thawkchhuak a, play-off an khel chhunzawm dawn. An sawp tak Ferencvaros pawhin play-off an khel zui ve dawn bawk.
Forrest hian minute 17-naa Bence Otvos own goal hmangin hma an hruai a. Igor Jesus goal hnih bakah James McAtee penalty hmangin goal an thun zui leh bawk a, 4-0 in an chak zui ta a ni.
Aston Villa leh Forrest te an chak
