Mizoram volleyball inelna sang ber title sponsor chungchangah Management Team leh MST Motors-in inremna siamin, championship hming atan ‘Ather Pro Volleyball League 2024’ tih a ni.
MST Motors-in title sponsor a chan hmasak ber a ni a, nikum khan Mizoramah Ather Electric Scooter lalutin hma lam panin ke an pen mek.
An sumdawnna enkawltu Hmangaihzuala chuan, “Kum kalta lamah Pro Volleyball League-in mipui lawm a hlawh hle a, Mizo thalaite’n hma an sawn zel theihna tura kailawn pawimawh taka title sponsor kan ni thei hi lawmawm tak a ni,” a ti.
MST Motors hian Bawngkawn, Aizawlah inhnaih takin showroom leh service centre an hawng a; Pro Volleyball vawi ruk huaihawt tawha title sponsor vawi thum ni tawh Tata commercial vehicle dealer Zothan Autoworks nen neitu thuhmun niin, Mizoram volleyball tana an inpeknaah Management Team chuan lawmthu a sawi.
Thla liamta khan Nagaland-ah chiang takin North East Olympic Games mipa volleyball-ah Mizoram a champion a; Mizo player-te’n hma an sawn tih an lantir laiin April ni 23-ah LPS Arena, Falkland Vengah mipa team ruk leh hmeichhe team nga inelna Pro Volleyball vawi sarihna tan a ni dawn a, ngaihven a hlawh phah hle a ni.
Management Team chuan sponsorship a tifel thawkhat tawh a; MST Motors bakah Zothan Autoworks, D3 Business Enterprise, GIG Motors, Ecosave Mizoram leh Orient Goldsmith chuan championship an sponsor a ni.
Kuriz Online Variety Store-in inkhel apiangah player of the match lawmman pein, kum dang ang bawkin KT Enterprise-in championship-a chetha mimal chawimawina a pe leh dawn bawk.
Ather Pro Volleyball League 2024
