Kumin MLA inthlanpui neih tura an party candidate tur tam zawk tun thla (August) hian puan hman an tum tih Congress president Lalsawta chuan a sawi.
Ningania thuthar thehdarhtute a kawmnaah zawhna chhangin Lalsawta chuan August-ah an party official candidate tur chu a tam zawk puan hman an tum thu leh, candidate-te dinna tur bial pawh an siksawi ve deuh a rin thu a sawi a ni.
BJP sawrkar paihthla turin political party intelkhawm a ngai tih a sawi a. Mizorama party zawng zawng thawh ho puiah a sawm. India ram pum, a bikin Mizoramin hma hun thim leh khirh tak a tawng mek tih sawiin, hetiang dinhmuna kan din chhan chu India rama hnam te zawkte sakhaw vawn leh hnam ziarang nuaibo tura BJP sawrkar hmalakna vang a ni tih a sawi a. Ram dangin India ram chu Kristiante tana ram hlauhawm zingah an chhiar tel tawh thu a sawi.
Hnam te zawk te nun dan leh ziarang nuaibo a, hnam lian zawkte tih dan tawm ngai turin Uniform Civil Code hman tum mek a ni tih MPCC president hian sawiin, opposition party-te intelkhawmin thawhhona siamin Indian National Developmental Inclusive Alliance (INDIA) an din hial tih a sawi a. BJP thlipui chuan Manipur state nuai mekin Zohnahthlak tam tak thihna, kutthlakna leh kangmei laka an tuarna chu a tuarpui takzet tih a sawi a ni.
“He hun thim leh khirh takah hian BJP thlipui dolet turin Mizorama political party zawng zawng thawhho puiah ka sawm a. He thlipui tlehtirtu ber, BJP emaw NEDA hmanga BJP thawhpuitute chu BJP atanga inthiarfihlim turin ka ngen a ni. Political party te chauh tana dolet hneh chi a nih dawn loh avangin kohhran leh tlawmngai pawl zawng zawng pawh thawhpuiah ka sawm a ni,” Lalsawta hian a ti.
August-ah candidate tam zawk puan hman kan tum – Lalsawta
