August thlaah hri vei hriat belh

Tun thlaah Covid-19 hri vei hriatchhuah an awm belh zel a, August ni 26 thleng khan mi 29-in an vei tih hriatchhuah a ni tawh.
June leh July-ah hri vei hriatchhuah an awm lo a, August-ah mi 30 dawn an awm tawh. Amaherawhchu, hri hi a hluar tihnaah ngaih a ni lo.
August thla chawhma lamah hri vei hriatchhuah zat hi a pung a, ni 15 thlenga hriatchhuah chu mi 26 an ni. Thla chawhnu lamah a tlem ta a, ni 15 hnuah mi pathum an awm tawh.
Sample endik hi a awm ve deuh reng a, ni 15 hnuah hian sample 59 endik a ni tawh. Chung zingah chuan hri vei pathum an awm a, endik zat atanga chhutin hri vei zat hi a tam lem lo. August ni 26-ah hri vei pathum an awm belh a, enkawl lai pakhat lo awm sa nen, hri vanga enkawl lai mi pali an awm mek.
IDSP te’n an chhinchhiah danin, March thlaah khan mi pathumin hri an vei a, April-ah mi 40-in, May-ah mi 57-in an vei. June leh July-ah hri vei hriatchhuah an awm lo a, August-ah ni 26 thlengin hri vei mi 29 an awm tawh. Tihian, kuminah mi 129-in hri an vei tawh tihna a ni. Nikum khan mi 40-in hri an vei.
Thu dawn danin, kumina hri vei hriatchhuahte hi ngaihtuahawm an ni lo a, natna dang vanga inenkawl, an inenkawlna lama Covid-19 an vei tih hriatchhuah an ni tlangpui.
Kumina hri veiah hian nausen an awm zeuh zeuh a, thla pawh la tling lo an awm. A upa lamah chuan kum 60 chuang tawh an awm.
Integrated Disease Surveillance Programme (IDSP) te’n an chhinchhiah danin, Mizoramah sample 19,99,109 endik a ni tawh a, hri vei tawh zat chu 2,39,805 a ni.