Australian Open hmawr bawk a hnai zel a, nimin khan hmeichhe singles semi-final pakhat zawka intum turin Kazakhstan nula Elena Rybakina leh Belarus chhuanvawr Victoria Azarenka-te’n an tumpui ve ve an hneh.
Russia rama piang, Kazakhstan-in a tennis career atana sum lama an puih theih zawk avanga Kazakh ni zui ta Rybakina hian Thawh-lehni quarter-final match pakhatah Latvia nula Jelena Ostapenko chu Rod Laver Arena-ah 6-2, 6-4-in a hneh a, Australian Open semi-final lut hmasaber a ni.
Wimbledon champion Rybakina hian French Open champion hlui Os-tapenko lakah harsatna lian a tawk lo a, hnehna a chan kawngah ace vawi 11 leh winner tum 24 a nei a; fourth round lama top seed Iga Swiatek pawh lo vawthla tawh a nih avangin champion thei tura rinkai a ni zui zel.
Seeded 22-na ni chunga inlan kum 23 mi Rybakina hian nimin quarter-final match danga American world number three Jessica Pegula (third seed) hnehtu leh Melbourne Park-a vawi-hnih lo champion tawh bawk Victoria Azarenka a hmachhawn tur chung-chang sawiin, match hau-tak dang atana inbuatsaih nghal a tul thu a sawi.
Kum 33 mi Belaru-sian seeded 24th Aza-renka hian a vawithumna atana Australian Open title a beisei leh mekna kawngah 6-4 6-1-a American Pegula hnehin quarter-final a paltlang a; third seed Pegula kha la dam zinga seed luah sang ber a nih laiin a Slam semi-final hmasa-ber tur a sualchhuak zo leh ta rih lo a ni.