Australia an chak ve ta nge nge
India rama Cricket World Cup khelh meka bul tan tha lo tak Australia chuan thawhtanni khan hnehna an chang ve ta nge nge a, an khingpui Sri Lanka an hneh.
World Cup-ah vawinga ngawt champion tawh a, champion ngun ber Australia hian World Cup 2023-ah beiseina sang tak nen bul tan mah se an che tha lo viau. An khelh hmasa pahniha an khingpui India leh South Africa lakah an tlawm a, ram 10 inel zingah table mawngphah luahtu an ni hman. Vawi hnih an tlawm zawn hnuin Thawhtannia an khingpui Sri Lanka lakah hnehna an chang ve ta nawlh.
World Cup 1996-a champion Sri Lanka hian vawi nga champion tawh Australia lakah an vaw hmasa a, an che tha lo hle. Over 43 leh ball pathumah an out fai vek a, run 209 chiah an khawltling. Sri Lanka tan hian Kusal Parera chuan ball 82 a hmachhawn atangin run 78 a siam a, run siam tam ber a ni a. Pathum Nissanka chuan ball 67 a hmachhawn atangin run 61 a siam ve bawk.
Vawi hnih tlawm zawn tawh Australia vuak hun a thleng a, chak an tumruh bawk a, bul an tan tha hle. Josh Inglis chuan ball 59 a hmachhawn atangin run 58 a siam a. Mitchell Marsh chuan ball 51 atang run 52 a siam bakah. Marnus Labuschagne pawhin run 60 a siam hman bawk. Australia hian over 35 leh ball pahnih atangin an mamawh run an thawkchhuak a, chiang kuang takin hnehna changin, World Cup khelh mekah a vawi khat nan point an hmu.
Chhuak hmasa lama tarlan tawh angin Cricket World Cup-ah hian ram 10 te an inel a, an inkhelh chhuah vek hnua point hmu sang pali in semi-final an lut ang. He thu buatsaih lai thleng hian inelna thlengtu India chuan vawi thum an khel tawh a, chak vekin hmahruaitu an ni mek.
Australia an chak ve ta nge nge
