FIFA Women’s World Cup khelh mek chu inrinni khan quarter-final khelh zawh a ni a. Inelna thlengtu Australia leh England in hnehna changin semi-final an inhlangkai.
Inelna thlengtu Australia hian Brisbane Stadium, Australia-ah France an mikhual a. Inkhel hmuhnawm takah hun pangngai leh hun pek belh minute 30 chhungin goal thun thei an awm lo va, tie-break hmanga thelh niin, semi-final lut tur zawk tihchian a ni.
Penalty shootout-ah hian France tana pet hmasa ber Selma Bacha-in a thelh a, a thlengtu in 1-0 in hma an hruai phawt. An hmahruaina tih zau theihna remchang nei mah se Australia tana pettu pahnihna Steph Catley chuan a thelh ve leh ta tlat. A pettu dangain an pet goal zel hnuin a vawi nganaa pettu pahnihin an thelh ve ve a, France in chak theihna hun tha an neih an chhawr tangkai zo lo. Hemi hnu hian Australia tana pettu pathumin an pet goal zawn laiin a Clare Hunt chuan a hlah ta tlat thung a, France in chak theihna hun remchang an nei nawn leh. Pet goal a semi-final lut mai tur an nih laiin
Kenza Dalia chuan an thelh leh ta tlat a, France an chak zo lo nawn leh. Hemi hnu hian Australia tan Cortnee Vine chuan a pet goal a, France tana pet hnuhnung ber Vicki Bècho-i’n a thelh leh thung a. Australian chuan 7-6 a hnehna changin semi-final an lut zui ta a ni.
Inrinnia inkhel hnuhnung zawkah England chuan 2-1 in Colombia an hneh a, semi-final an lut.
Stadium Australia-a inkhelah Colombia in goal an thun hmasa a, minute 44-naa Leicy Santos goal thun hmangin hma an hruai. England hian minute 45+6-a Lauren Hemp goal thun hmangin an si phurh an sut a, 1-1 a inhnehtawk chungin chawlhlawk an hmang.
Chawlhlawk hnu lamah England an khel tha chhunzawm a, minute 63-naah Alessia Russo chuan hma an hruai letna goal a thun a. An khingpui Colombia chu 2-1 a lehthalin semi-final an lut ta a ni.
Semi-final hi Thawhleh tlar dar 1:30-ah khelh tan a ni ang a. Khel tha tluang tak Sweden chuan Eden Park, New Zealand-ah Spain an hma-chhawn ang a. Nilaini chawhnu dar 1:30-ah inelna thlengtu Australia chuan Stadium Australia-ah England an hmachhawn ve thung ang a. Final hi Pathianni zanah khelh a ni ang.
Australia leh England an tlang
