Naktuk, Pathianni atanga Melbourne Park-a khelh tan tur Australian Open hmeichhe singles draw-ah hian women’s singles title hawn thei tura rinkai ni pha thenkhat zinga pathumte i han bihchiang deuh teh ang.
ELENA RYBAKINA (KAZAKHSTAN)
Kum 2022 Wimbledon champion Rybakina hian Australia leilungah a career-a a Grand Slam title pahnihna tur a beisei mek a; nikum Melbourne Park final match-ah Aryna Sabalenka a ngam lo a, kumin hian pahnihna zawk nih a tum tawh lo ang!
Russia rama piang ni chunga Kazakhstan khua leh tuia inlet zui ta Rybakina hian Indian Wells leh Rome khawpuiah WTA 1000 title pahnih a lo sualchhuak ve tawh a; mahse, kum 24 mi hi hliamin a tihbuai ve fo avangin a fit lo leh thin a, Tokyo Open atanga a inhnuh-dawh hma khan Dubai, Roland Garros leh Cincinnati lamah tournament khelh laiin a lo inhnukdawk tawh bawk.
Big-serving Kazakh hian kuminah leirem a rawn rap chho leh tan dawn niin a lang a, Australian Open inbuatsaihna lian Brisbane International final-ah Sabalenka laka phuba la chungin 2024 season-a a trophy hmasaber a hlawhchhuak nghal thawt.
JESSICA PEGULA
(UNITED STATES)
Grand Slam lama hmingchher la hmabak ni mah se Pegula hian kum 2021 atang khan major tournament bikah hian quarter-final stage vawiruk a chuangkai tawh a, a piahlam ram a la thleng zo lo tih mai a ni!
Kum 29 mi Pegula hian 2023 season kha hmeichhe tennis kum tawp kharna WTA Finals runner-up ni chungin a khar thei a; mittlung taka group stage a paltlang hnuin US Open champion Coco Gauff lakah straight sets semi-final hnehna a chang a, a hneh loh awmchhun chu a hmawrbawknaa a ngam loh world number one Iga Swiatek chiah kha a ni.
American hian Grand Slam tournament a khelh hnuhnungber Wimbledon-a quarter-final a paltlang zawh loh leh hnu khan thlen phak loh ai chuan last eight luh leh kha a la tha tho tho tih sawi chungin player tha zawk ni tura a infuih sauh sauh thu leh rim taka a beih zui zel tur thu a sawi.
MARKETA VONDROUSOVA (CZECH REPUBLIC)
Australian Open fourth round la pel zo ngai lo Vondrousova hian Wimbledon-ah a Grand Slam title hmasabewr sualchhuak nawlhin, unseeded player zinga Wimbledon women’s title la thei hmasaber a nih bakah kum 2014 champion Petra Kvitova hnu lama Czech hmeichhe zinga he title hawn leh thei hmasaber a ni nghal bawk.
2020 Olympic silver medallist Von-drousova hian kum 2019 daih tawh khan unseeded player ni chungin Roland Garros final pawh a lo thleng tawh a, Ash Barty a ngam zo ta lo a nih kha.
US Open-a a thlen san berah quar-ter-final khel ve tawhin, kum 24-a upa left-hander hian Melbourne Park-ah hma thar zauh ngei a tum hmel a, a thlen tawh chin 4th round pel zo tak ang maw?
Australian Open-a mit la tur hmeichhe pathumte
