Australian Open draw:
AO title 3 lak tlin tum Sabalenka
Pathiannia khelh tan tur Australian Open draw an tarchhuah hnu lawkah world number one Aryna Sabalenka chuan a tum thumna atana hmeichhe singles title lak leh ngei a tum thu a sawichhuak a; Melbourne Park-a champion erawh chuti maia awlsam a ni dawn hauh lo a, champ tura rinkai dang Iga Swiatek leh Coco Gauff bakah nikum final-a Belarusian hnehtu defending champion Madison Keys-te pawhin major trophy nena kum bul tan an tum ruh ve khawp ang le!
Two-time winner Sabalenka hian a match hmasaberah French wildcard Tiantsoa Rakotomanga Rajaonah a tum dawn a; a title kawl lai humhim tura a chetchhuah vawi khatnaah Keys chuan Ukraine player Oleksandra Oliynykov a hmachhawn thung ang.
Tunhnai kum chho liamtaah khan mipa game aiin hmeichhe game hi a open zawk a, chumi awmzia chu hmeichhe singles lamah hian champion thei an tam zawk tihna a ni.
Mipa singles lamah chuan world number one Carlos Alcaraz leh defending champion Jannik Sinner-te hi major tournament-a in champion chhawk an ni chho ta mai a; record ropui bik kawl tura Grand Slam title pakhat tal lak leh tum ruh mek Novak Djokovic hi a la awm bawk tih a ni deuh mai!
Sabalenka hi tuntum Australian Open-ah hian a champion leh a nih chuan a career-ah belhkhawmin Grand Slam title panga a la tling ve tawh dawn a ni.
Kum 27 mi hian Australian Open inbuatsaihna Brisbane-ah a zawna a vawi thumna atan final lutin, Marta Kostyuk a hneh a, Melbourne Park-ah pawh rinkai a ni chho zual sauh a, mahse, Sabalenka hian Grand Slam stage-ah chuan engmah sawilawk theih awm loh thu leh warm-up tournament-a hlawhtlin ringawt chu champion hriltu a nih loh thu a sawi.
Brisbane trophy a lak ruala an kawmnaah Belarusian chu a season kal zel tur chungchang an zawt a, “Tennis a ni miau a, engmah sawilawk tak tak theih a nih lohna lai tak hi he sport duhawmna a ni.
“Major tournament-ah hi chuan englai pawhin i theihna finfiah zel a ngai a, kei pawhin ka sawilawk theih awmchhun chu tournament ka hmachhawn dawn a, theihtawpin ka fight ang a, ka game tinah ka insawrbing dawn a, keimah leh keimah hi hmasawn zel ka tum ang a, hriselna leh thahrui neih a pawimawh bawk,” a ti ngam chauh!
Champion tura rinkai dang six-time major champion Iga Swiatek chuan nikuma a Wimbledon title hmasaber a hlawhchhuah hnu khan major title zingah pakhat chiah hawn loh a nei ta a, chu chu Australian Open title hi niin, kumin hian a hlawhtling a nih chuan a career-ah Grand Slam title pali a la kim vek tawh ang.
Melbourne Park tournament-a a chetthat dan azirin World No. 1 ranking luahkir lehna hun remchang pawh a inhawng thei dawn a, mahse, kum khat kaltaa AO semi-final lut Swiatek hian Grand Slam mellung thar phun lam a lungkham ber lo tih United Cup lama Gauff leh Belinda Bencic laka a tlawm hnuah sawiin, pressure insiam chiam a duh lo tih a tarlang.
World No. 3 Gauff pawh nikum French Open title latu niin, kum 2023 US Open trophy a lak hnua a major title pahnihna a ni a, Australian Open-ah pawh hian champion tum tana paltlang ngai langsar tur zingah a tel leh mek.
American Amanda Anisimova pawh nikum Wimbledon leh US Open final khel ve ve a ni a; nikum hmeichhe tennis season kharna Riyadh khawpuia WTA Finals title latu Elena Rybakina pawh Melbourne khawpuia chefuh thei zingah a tel.
Nikum Wimbledon third round-a Aryna Sabalenka laka tlawm Briton Emma Raducanu chuan third-round match a khel pha leh a nih chuan nikuma a ngam loh world number one Sabalenka bawk a tum leh thei ang.
British number one Raducanu hi Ningania draw tarchhuah takah khan seeded zingah telin, 28th seed pek a ni a, 2022 US Open hnu lama seeded a nih leh vawi khatna chiah a ni.
Kum 23-a upa Briton hian a match hmasaberah Thailand player Mananchaya Sawangkaew a tum dawn a, second round a lut a nih chuan Austrian Anastasia Potopova leh Suzan Lamens of the Netherlands inkhela chak zawk zawk a hmachhawn leh ang a, a chak leh a nih chuan third round lut tura ngaih ngheh Sabalenka nen an intawng leh thei dawn.
Belarusian hian French wildcard Rajaonah tum chungin Melbourne Park-ah bul a tan dawn a nih kha.
Keys kalkawng hautak dawn
Defending champion Madison Keys chu unseeded Ukrainian Oleksandra Oliynykova lakah bultanna harsa lo tak paltlang tura ngaih ni mah se American ninth seed tana title beiseina kalkawng hi tluang chho zel tura ngaih a ni lo!
Keys hian fourth round a lut a nih chuan a chipui sixth-seeded Jessica Pegula a tum thei dawn a; a tlang chho zel a nih pawhin quarter-final stage-ah American dang fourth seed Amanda Anisimova nen an insu leh thei dawn a ni.
Twice champion Sabalenka tana fiahna hmasaber tura ngaih chu semi-final stage-a third seed Coco Gauff a hmachhawn theih tur hi a ni ang. First round-a Gauff tum tur hi 55th-ranked Uzbek Kamilla Rakhimova ni.
Women’s second seed Iga Swiatek pawhin first round-ah qualifier mai mai su dawn mah se a career-a Australian Open title leh a Grand Slam trophy pasarihna tur a beiseina tur kawng quarter-final stage-ah tunlaia intuaithar mek Kazakh Elena Rybakina a su thei dawn!
Wimbledon champion hlui Rybakina hi fifth seed pek a ni a, nikum November thla mai khan a WTA Finals trophy hmasaber a sualchhuak a, Melbourne Park-ah hian nep thut thei a ni lo!
Rybakina hian first round-ah unseeded Slovene Kaja Juvan a tum ang.
Australian Open draw: AO title 3 lak tlin tum Sabalenka
