Hmeichhe singles champion lai Aryna Sabalenka chuan khuain a bumro kara khelh tan tak Australian Open-ah nimin khan hnehnain bul a tan a, Sloane Stephens laka 6-3 6-2 hnehna nen second round lutin, kumin hian a title kawl lai a humhim leh thei a nih chuan mi huai kal hmasa paruk – Margaret Court, Evonne Goolagong, Steffi Graf, Monica Seles leh Martina Hingis-te hnungzuiin Melbourne Park-a Australian Open women’s singles title vawithum la zawn thei zingah a hming a chuang ve tawh ang a, kum 1999 daih tawha vawithum champion zawn Swiss nula tawih ni thin Hingis hnu lama chuti ang ti leh thei hmasaber a ni ang.
World number one Sabalenka hian Rod Laver Arena-a American laka straight-set hnehna hmahruai a chan rualin Australian Open-a a tlangnel thu leh a in ang maia a ngaih thu a sawichhuak.
Kum 26 mi hian chuan Melbiourne Park-a a kirleh thei a hlimpui takzet tih sawi chungin, “He hmun hi ka ngaina a, stadium khata thlirtu an awm bawk nen hei bak baka dream dang a awm thei lo e.
“Match hautak zet a ni a, ani hmachhawn kha engtik lai mahin a awlsam ngai lo. Ka khelh that ber game khel chhuak zoin inhre lo mah ila straight sets hmanga ka chak thei hi ka lawm em em a ni,” a ti.
Sabalenka hian hnehna a chan zawhah Melbourne mipui tihlim turin khelmual chhungah lam a han thei vel a, social media TikTok lamah court chhunga a team-te nen an lam lai hi a darh nghal chuai chuai!
Top seed hian nimin first round inkhel danga British beiseina Sonay Kartal vawtlatu Spaniard Jessica Bouzas Maneiro lakah fiahna dang a hmawchhawn zui leh ang.
Sabalenka hian a career-a a vawikhatna atan world number one ni chungin nikum khan kum a khar a, Australia leilungah hian two-time defending champion leh top seed ni chungin bul a tan a, a title kawl lai humhim leh thei turin amahah mite’n beiseina an kham sang hle niin a lang!
Kum khat chhunga Grand Slam hmasaber kha stadium pui ber pawn lam match-chungkhuh nei Rod Laver Arena erawh ruah hian a tibuai ve lo a; nikum final-a Sabalenka laka tlawm Zheng Qinwen pawhin hul phiangin Romanian qualifier Anca Todoni lakah hnehna hmasa a sualchhuak ve bawk.
Season liamta tawp kharna tournament WTA Finals-a Coco Gauff hneh loa runner-up ni ta Chinese fifth seed Zheng hian 7-6 (7-3) 6-1 hnehna nen tournament bul a tan.
A career-a top-50 chin player la hneh ngai lo kum 20 mi lek Todoni tan Olympic gold medallist hmachhawn kha hautak viau dawnin lang mah se set khatnaah amah aia kum hniha upa Zheng-i kha a chhaihbuai hneh viau mai a, set hnihnaah erawh Rod Laver Arena chhunga Chinese fans tan hlauhthawn tur a awm ta lo!
Nimin inkhel dangah Russian tleirawl Mirra Andreeva chuan first round-a a tumpui Czech Marie Bouzkova lakah 6-3 6-3 hnehna changin, kum 17 mi Russian hian 2023 French Open-ah a Slam debut a nghakchhuak ve chauh a, nikum khan Roland Garro-ah a career-a a vawikhatna’n major singles semi-final thlengin, WTA ranking-ah 15-na a kai chho ve hial a; tuntum hian second round lamah Magda Linette leh Moyuka Uchijima inkhela chak zawk zawk a tum leh ang.
Australian Open: Ruahpui vanawn hnuaia chak Sabalenka
