Siaha Officers’ Club (SOC) leh PHE Department tangkawp chuan nimin khan Association for Voluntary Blood Donation (AVBD) Siaha hnenah khum thleh theih (folding bed) an hlan.
H. Vabeitha, President, SOC kaihhruai hlanna inkhawm DMS Hall, District Hospital, Siaha-a neihah K. Chhihrau, Executive Secretary, MADC leh Patron, SOC ni bawk chuan, SOC ten thisen pe tur ten nuamsa leh hahdam zawka thisen an pek theihna tur atana tangkai tak ‘Folding bed’ pe tura ruahmanna fel tak an lo duang chu lawmawm a tih thu a sawi a. India ramah thisen mammawhtuten harsatna tamtak an tawk thin tih tarlangin, Mizoramah pawh thisen mamawh khawp hmuh a har chho hle tiin thisen pek lamah harhthar a tul hle a ti. |halaite zingah thisen pe thei lo tam tak an awm tawh a, a lungchhiat thlak hle a, thangthar lo awm leh zel tur ten thisen pe thei ngei tura hriselna vawng tha turin nu leh pa, kohhran leh NGO-ten tanlak a tul hle a ti bawk. India rama state dangte nen khaikhin chuan Mizoram chu kan ziaawm hle tih a tarlang a, kohhran, tlawmngai pawl leh zirlaiten thisen a thlawnin an pe fo thin a, hei hian nasa takin thisen mamawhtute a tanpui thin a, hetiang chin dan tha hi chhawm nung zel turin mi tinin tan la thar se a duh thu a sawi a ni.
K. Chhihrau chuan thisen pek chu nunna hlu tak chhanna a nih avangin mi tin thisen pek lamah tan lak thar a tul hle a ti a. Thisen hi kum a lo tam tawh chuan pek mai a harsa thin a, pek theih hun hi mihring hrisel lai a nih a ngai a , chuvangin pek theih hun laiah chuan pe fo thin turin uar zawka inzirtirna kalpui a ngai a ti. ‘|hian chhan thih ngam’ ti a hriat kan ni thin a, tunlaiah chuan sa leh ral do tur a awm tawh lo a, thian chhan thih ngam a kan chet theihna ber chu thisen pek hi a ni, a ti. Thisen mamawh khawpa dam lo thei vek kan ni tih hi theihnghilh loh a tul a, midang thisen mamawh hun nei thei vek kan nih avangin, keimahni ngei pawhin midangte nunna hlutak chhanna turin thisen pek i uar sauh sauh ang u tiin kalkhawmte leh Siaha mipuite a sawm nghal bawk.
Dingluaia, Superintendent of Police, Patron, SOC , Siaha pawhin thu sawiin thisen pek chu thil ropui leh tlawmngaihna sang tak a ni tiin thisen pe turin mi tinin mawhphurhna kan nei vek a ni, a ti a. Midangte tanpuitu ni tur leh thisen pek lama hmasawnna rahbi thar kai turin mahni theuha tan la thar turin a sawm a ni.
Dr. Lalnunziri, Sr. Chief Medical Officer chuan Siaha Officers’ Club- ten nachang hriaa, thisen petuten tangkai taka an hman tura folding bed an pe chu lawmawm a tih thu a sawi a. Siaha Officers Club- te chu Siaha District- tan tangkai takin an lo luangchhuak tawh thin tiin, an thilpek chu a hlu zual hle a ni a ti.
Siaha Officers Club- te hian Folding bed pathum hlan in, PHE Department hian Folding bed pakhat an hlan bawk a. Folding bed hi pakhat cheng 5329 man a ni
AVBD hnenah folding bed hlan
