Kolasib District Education Committee buatsaihin National Award to Teachers 2023 dawngtu, Govt Diakkawn High School Kolasib-a zirtirtu Lalthianghlima chawimawina leh lawmpuina hun Ningani khan hman a ni.
District Education Committee chairman, bawrhsap John LT Sanga chuan zirtirtu tha chawimawina dawngtu Pu Lalthianghlima hi Committee hmingin lawmpuina memento a hlan bakah ama pualin lawmpuina puanbah a hlan a. Pu Lalthianghlima chu Mizoram leh an district tihmingthatu a nih thu sawiin, India rama zirtirtu tam tak zinga zirtirtu tha 50 thlan zinga a tel chu a chhuanawm a tih thu a sawi.
Ram siamnaah zirtirtuten an thawhhlawkin, an mawhphurhna a lian ber a, ram hmahun innghahna zirlaite zirtirtu an nih angin, an kaihhruai zirlaite nun thlak danglam turin thahnemngai taka an thawh a tul tih bawrhsap hian a sawi a. An tawngkam khat lekin zirlaite fuih phurin, chakna a pe thei a, an tawngkam ho tea ngaih pawhin a tihnual thei bawk tih sawiin, zirlaite hmaah tawng fimkhur tur leh zirlaite dawmkang thei tur zawnga zirtir thin turin a chah a ni.
National Award to Teachers dawng tur hian online-a dilna thehluh a, District Selection Committee, State Selection Committee, Regional Selection Committee leh Independent Jury at National Level te paltlang hnuah Ministry of Education-in a pawm a ngai a. Award dawng tur hian mi 50 thlan niin, award hian chawimawina thuziak bakah sumfai Rs. 50000 leh silver medal a keng a ni.
Kumin September 5 khan Lalthianghlima hian Vigyan Bhawan New Delhi-ah India President Droupadi Murmu hnen atangin National Award to Teachers hi a dawng a ni.
Award dawngtu zirtirtu chawimawi
