JC.Zoremi Hmar Joute
Pathian khawngaihna azarah ka lehkhabu pathumna, Awmhar Khawnvar tih chu Chanmari YMA Hall-ah, Prof.RL Thanmawia’n a tlangzarh a, he hun hmang tura hun leh thâ senga lo kal zawng zawngte chunga ka lawmna hi a liamin a liam tak meuh meuh a ni.
Pi Mali host-na hnuaiah programme tan a ni a, hun serh te kan hman zawhah lehkhabu thlir lâwkna hun Pu C.Lalnunchanga’n ngaihnawm takin a hmang a, a ngaihnawmin a preview tur lehkhabu kha a ching let fe tih a hriat; ka ziah aia tha fe-ah a chhuah ni berin a lang. Tlangzarhna hun kan hmang leh a, Pa Mawitea thu sawi a ngaihnawmin a khamawm loh hle. The Aizawl post Editor, Pu Buata thu sawi lah ngaihnawmin a bengvarthlak a, Kids Den School Principal Ruth Vanlalthakimi Hmar thu sawi phei chu mi zawng zawng ngaihthlak atan ka awt ngawt mai.
A duh apiang thu sawi huna rawn sawi te thu sawi ngaihnawm em em vek a, minute 7 hun pek niin, a tu a mah kha hun tiam bawh chhia leh ninawm khawpa thu sawi rei an awm lo.
Awmhar Khawnvar bu chhungah hian thupui then hrang 42 awmin phek 222-a chhah a ni a, Zonun ze mawi vawn nun zelna tur lam hawi te, aia upa zah te, Mizo tawng humhalhna lam hawi leh ruihhlo belhchianna te, hmân lai Mizo nun leh nula tlangval inrim thin hun lai thlenga ziah a ni. Environment humhalh te, hnam hmangaihna lam thu leh hringnuna a mawi lai, rilru hriselna lam te ziah a ni a, Rs 250 man niin heng, Synod Book Room hrang hrangah te, Lv.Art (Lengzem office) Chanmari YMA Hall hnuaiah te, CVL.Bass Electric vengah te, Lianchhungi book store, Dawrpuiah leh RL.Nutei book store, Dawrpuiah te hian lei tur a awm e.
Tun lai hian lehkhabu zuar chhuak leh a dawr neite pawhin an sawi danin lehkhabu hralh a har hle a ni awm a, Internet khawvelin min chiahpiah hmaa kawhar hnem atana lehkhabu chhhiar tlut tlut hun lai nen kha chuan danglam tawh tak a ni. Khâng hun lai kha chuan hriat belh chakna neiin leh khawhar hnema lehkhabu kuan mai thin kan ni a. Thawnthubu leh kan hmuh phak ang ang chhiar zel tum mi kan ni deuh thum nih kha. Tunah zawng hmanhmawhna khawvelah kan cheng tawh a, thalai leh naupang deuh chuan chhiar hah ngai lova ngaihthlak mai te, internet atanga kan hmuh leh hriat duh en/ngaihthlak zung zung mai kan duh tawh zawk a, heihian nasa takin a bu ngeia chhiar duh kan tlem sawtzia a tilangin ka hria.
Kan hma ngaitu ten kan thu ziak a bu ngeia chhuah turin thu min han rawn a, lehkhabu hmasate avanga mi tlem tein min lo hre ve a ni tih hre chung pawhin vawi khatah copy 1000 bak kan chhu ngam meuh lo. A sumdawnna ang zawng chuan tih sa loh loh a ni. Chumchi leng kha copy 6000 vel chu hralh vein ka inhria a, a hnu lama ka ziah thar leh chu a sak talh tawh. Chhut man a to si, market a chhe si, hei vang hian lehkhabu lo chhuah ve tawh tam tak chuan an chhuah nawn loh phah ve niin a lang.
Harsa takin, neih thing lung khawng tak meuhin lehkha bu kan han chhuah a, lehkhabu dawrah a bâin kan han pe nghal sap sap a, a book room lam pawhin payment ta’ng e ti chuang hek suh; a hlêp chu sawi loh, a capital atana kan hman zat takngial pawh hmu let tur chuan a kuma kum a ngai! Hming nei sa/mi hriat sa deuh ziak pawh ni se a baa book store-a dah tho tho a ngai a, min payment nghal thin chu dawr pathum vel an awm chauh mai a, chhut man kan ba ve thei si lo va, a hlawma sum chhuak kha, tlem te tein a lo let a, ei zawn nan chuan a hlawk lo ber mai awm e.
Chutih rualin kan chân ta vek emaw, kan chawi belh hial emaw erawh a ni bik law…vawi hnih vawi thum chhut nawn ngai khawpa kan hralh chuan manhla ve tak a ni tho. Lehkhabu chhuah hreh phah nan te khan in lo hmang ang e; hralh hnem miau chuan hlawk lo uchuak zawng a ni bik lo a nia.
A hlawma min laksak thei, lehkhabu ziaktute innghahna ber pakhat Synod Book room lam chuan Pathian thu lam hawi emaw, rinna lama mipui min kaihruai thei lam hawi chauh lo chu an la tawh dawn lo tih thawm a lo awm a, lehkhhabu ziak thin, Pathian thu lam hawi ni lem lo ziak thin tan chuan hnual rawihna tham a ni. Kan innghahna awmchhun chu State Library chauh a ni dawn ta a, chu lah ‘pawisa a awm lo’tih a ni deuh reng mai bawk si a, lu a hai map map hle a ni.
Lehkhabu ziaktute hian ngaihven leh ngaihsak kan phu a, lehkhabu ziaktute vanga vawiina he dinhmun hi thleng kan ni. Ziaka dah awm lo se kan history tam tak hi hriat an ni lo ang a, ziaka dah awm lo se kan ram leh hnam thil pawimawh zawng zawng hi hriat ngaihna a awm dawn lo a ni. Kan mi hmasa ten mual min liamsan tawh mah se, an kut chhuak lehkhabu hlu tak tak avanga vawiina Mizote hian kan chinchang hre ve chauh kan ni a, vawiina ziak mite avang hian thang lo thar zel tur ten kan vawiin hi thawnthu chhiarin an la rawn chhiar ve ang a, vawiina ziak mite kut chhuakte hian Mizo history chan changin, duat leh zah taka vawn that an la hlawh ve dawn a ni.
Kan sawrkar hian lehkhabu ziaktute hi min ngaihven ve se la, kan hah man tal kan têl ve theih nan kawng min han hawnsak se la, State Library tal hi kan tan innghahna tlâk han ni ve se la kan va lawm dawn teh lul em!