Kumin January thla maia Australian Open second round lut pha British number one Katie Boulter chuan nimin khan Miami Open fourth-round paltlang zo loin Victoria Azarenka of Belarus a hneh lo.
Kum 27 mi Boulter hi hmeichhe singles ranking-ah 30-na ni mekin, Grand Slam-a vawihnih champion tawh Azarenka lakah 7-5 6-1-in a tlawm a; kum 34 mi Belarusian hian quarter-final lamah Yulia Putintseva of Kazakhstan a hmachhawn zui leh ang.
Boulter hian straight sets hmanga Brazil nula Beatriz Haddad Maia a hneh hnuah he tournament bika a vawikhatna atan fourth round a lut a, world number one hlui Azarenka a ngam ta lo a ni.
Vawithum ngawt Miami champion ni tawh Belarusian Azarenka tum leh tur Putintseva chuan round lina inkhel dangah Ukraine player Anhelina Kalinina chu 6-4 7-6 (7-5)-in a hneh ve bawk.
Inkhel dangah American world number three Coco Gauff chu French 23rd seed Caroline Garcia lakah rin loh takin a tlawm a, Garcia hian a vawikhatna’na Miami last eight lut turin 6-3 1-6 6-2 hnehna a sualchhuak nawlh.
Round hmasa lamah Garcia hian four-time Grand Slam champion Naomi Osaka a lo hneh tawh bawk a, semi-final luh inchuh match-a a tum tur hi American Danielle Collins leh Romanian Sorana Cirstea inkhela chak zawk zawk an ni ang.
Kazakhstan player leh world number four ni bawk Elena Rybakina pawhin 6-3 7-5-a Gauff-i chipui American dang Madison Keys a hneh a, last eight lamah Greek eighth seed Maria Sakkari a su zui leh ang.
Sakkari hian inkhel hah loin quarter-final a lut a, a chhan pawh a tumpui tur Russian Anna Kalinskaya inhnuhdawh vang a ni.
Azarenka lakah Boulter a tlawm
