Latin star Bad Bunny chu Latin artist zinga touring revenue dollar tluklehdingawn kai thei hmasa ber a ni a, hei bakah hian sap hla ni lo sa zaithiam zinga touring revenue dollar tluklehdingawn kai the hmasa ber a ni bawk. Bad Bunny hian DeBI TiRAR MaS FOToS World Tour a neih mek chu Europe lamah a la chhunzawm zel bawk a ni.
Billboard Boxscore-in a tarlan danin Bad Bunny hian tour hrang hrang a neih tawh atanga a sum hmuh belhkhawm hi dollar tluklehdingawn a kai tawh a. Benito tia an koh duat he Latin artist hian chart lamah pawh record a lo siam nual tawh a, 2020 khan a album El Ultimo Tour Del Mundo chu Billboard 200 (US albums) chart-ah No.1 kaiin, Spanish hla hlang awmna album zinga he chart-a No.1 kai thei hmasa ber a ni.
Bad Bunny hian 2025-2026 DeBI TiRAR MaS FOToS World Tour-ah hian ticket maktaduai 2.4 hralhin dollar maktaduai 360 a hmuchhuak thei a, he a tour-ah hian US-ah show a nei miah lo lehnghal a, US-a show nei lo zingah kum khat chhunga tour atanga sum hmu hnem ber record a siam bawk.
Bad Bunny hian 2024 khan Most Wanted Tour neiin, 2022-ah El Ultimo Tour del Mundo Tour a neih bakah 2017 leh 2019 inkarah show a nei nual bawk a, heng a rimawi zinkawnga tour a neih tawh zawng zawnga a sum hmuh belhkhawm hi dollar tluklehdingawn a tling ta a ni.
Hetianga tour hrang hrang belhkhawm a sum tlingkhawm dollar tluklehdingawn kai thei artist 25 chiah an la awm a, Bad Bunny hian a tour neih mekah European leg a chanve vel chauh a la nei a, chuvangin a tour sum lut hi a la pung leh dawn a ni.
Bad Bunny tour record a siam
