Bana Kaih diltu zinga 51-in bank atangin loan an la tawh

Bana Kaih diltu zinga 51-in
bank atangin loan an la tawh
Sawrkar flagship programme, guatantor-a sawrkar a tanna tur Bana Kaih Scheme-ah dilna 588 pawm a ni tawh a, hetihlai hian bank-a lut tawh zingah 51 hnenah loan pek a ni tawh.
Mizoram State Policy Coordination Committee chu an chairman, chief minister Lalduhoma hoin Nilaini khan an thukhawm a. Bana Kaih scheme hnuaia progress partner-te hnena hmalak mek dinhmun an thlirho.
Thawh khatnaah hian loan component-ah dilna 11438 a lut a, line department hoin 588 an pawm tawh. Pawmsak tawh DPR siamsak ngai 1687 awmin, endik hmabak 8249 a awm a ni. Dilna 914 erawh hnawl a ni a. Reject hi a dil dan dik hrilh a, dil tir leh vek dan dap tum a ni.
Dilna pawmsak, bank lama lut tawh 517 a awm a. Chu’ng zinga 51 hnenah bank hian loan an pe tawh a ni. Loan an la pek chhuah tlem chhan chu, loan an hmuhna tam ber PMEGP portal a chian loh vang a ni tih sawi a ni a. Tunhnaiah a tha leh tawh a, chak zawka an pek theih an inbeisei.
Loan component bikah, hma an lakna tura sum mamawh tur dik tak aia tam daih diltu an tam avangin line department leh bank tana lo pawm a harsat chang a awm tih sawi a ni a. Central schemes nen kalkawp (convergence) a nih si avangin an dilna scheme-in a phalsak chin aia tam loan pawmsak a harsa tih sawi a ni.
Thlai leh ran insurance company-ten fel zawka an scheme an kalpui theihnan a tul anga hma lak an rel bawk.
Chief Minister Special Package thawh khatnaah mi 2000 target siam ni mah se, a diltute zingah cheng nuai khat tling lo dil engemawzat an awm avangin dawng tura thlan hi 2226 an ni a, dilna thenkhat chu hma an lakna tura an sum mamawh zat aia tam dil an awm nia a lan avangin a dawngtu tur zat hi la danglam thei tura ngaih a ni.
CM Special Package dawng tura thlante hi training pek thuai tum a ni a, training zawh veleh sum pek an ni ang
July thla chhung hian line department-ten dilna an la kawl chu a tam thei ang ber endik nise, August atang chuan dilna hawn leh tan nise an ti. A scheme kalpui zelna tur thil pawimawh an sawi bawk.