Bangladesh PM hlui thubuai November 28 hmaa thehlut turin hriattir

Bangladesh PM hlui thubuai November 28 hmaa thehlut turin hriattir
Bangladesh court chuan police te hnenah an PM hlui Sheik Hasin leh midang 23 te tualthah thubuaia puhna chhui chianna report chu November ni 28 ral hma ngeia thehlut turin a hriattir.
He tualthah thubuai hi Mirpur, Dhaka-a college zirlai kum 18 mi thihna kaihhnawiha thubuai thehluh chhuina kal zel a ni a, Hasina kaihhruai Awami League sorkarin zirlai lam kaihhruai mipui nawrh huaihawtte an beihna avanga thihna hi thleng a ni.
He buaina chhuah hnu August ni 5 khan kum 77 mi Hasina hi India ramah a tlanchhia a, an ramchhung buaina avang hian July thla atang khan mi za chuangin nunna an chan phah tawh a ni.
He thubuai, court in police te a hriattir ber hi August ni 15 khan boralta unaupa hian a thehlut a, Hasina kaihhruai sorkar chu tharum thawhnaa inrawlhah leh buaina siam tura inpeihsa an nih thute a tarlang a ni.
Hasina bakah hian he thubuaiah hian home minister hlui Asaduzzaman Khan, Awami League GS Obaidul Quader, Law minister hlui Anisul Huq leh police inspector general hlui Chowdhury Abdullah Al-Mamun te an tel bawk.