Mizorama bank inbun ho zingah pasarih chu credit deposit ratio a chhe fal hle a, 31% aia hniam vek an ni. Mizorama sawrkar hriatpui bank awm zawng zawng chu Ningani khan Aizawlah an intawkkhawm a, an hnathawh thlirletin, State Level Bankers Committee (SLBC) for the quarter ending September 2025 neih a ni.
Bank chu an hnena sum dah (deposit) tlingkhawm atanga tehin, zaa 60 tal mipui hnena puktir (advance) tura beisei an ni a. Hei hi an hnathawh tehna langsar taka hman a ni. Tun SLBC report-a a lan danin YES Bank, Bandhan Bank, SSFB, AXIS, HDFC, ICICI leh CBI CD ratio chu zaa 31 aia hniam vek an ni.
Hmanpuitu chief minister Lalduhoma chuan thutkhawm hmasa atanga tehin hmasawnna hmuh tur a awm chu lawmawm a tih thu a sawi a. A bikin CD ratio nei tha pathum – Mizoram Rural Bank, State Bank of India leh Apex Bank chungah lawmthu a sawi. Chutihrualin, bank thenkhat, loan pe chhuak tlem leh lutuk, national benchmark phak lo leh lutuk erawh enliam chi niin an ngai lo tih sawiin, CD ratio nei hniam ber, 5.30% chauh tlin phak bank pakhat chu an insawifiahna a hnena thehlut rang turin a hriattir.
“Sawrkar chuan mitin ban phakah bank hi inzarpharh ula kan duh a, tuna branch kan neih mek 278 zinga 183 hi Aizawl, Lunglei leh Kolasib-ah an awm a. A dang 95 hi district dang 8-ah an inzarpharh. SLBC leh RBI hnenah bank-te inzarpharh dan hi lo ennawn a, thingtlang mipui ban phaka intizau turin ka ngen a ni,” a ti.
Mizoram-a bank branch tam takah thawktu an tlem thin avangin mipui tan an tangkai tur angin an tangkai zo lo thin tih chief minister hian a. Hnathawktu indaih tawk tak dah tum theuh turin bank thuneitute a ngen bawk.
State sawrkar flagship programme – Bana Kaih Scheme-a thawhpui atan bank pathum inremna an ziahpui a. An ni hian tha taka an thawhpui chuan an mamawh an phuhru zo tura ngaih ni mah se, State Policy Coordination Committee hnuhnung ber report-ah an partner bank-te Handholding loan hi zaa 42 hnenah chauh vawiin thlengin an la pe chhuak a. Sawrkarin chak taka kalpui a duh si a, partner bank neih belh mai thain an hria tih a sawi a ni.
Bank pasarih CD ratio-in zaa 31 pha lo A hniam ber insawifiah turin CM-in a ti
