‘Barbie’ leh ‘Oppenheimer’ an la kal tluang
‘Barbie’ chuan an tlangzarh atanga weekend vawi li-naah US-ah cinema hall ticket hralhna atangin dollar maktaduai 33.7 a lalut leh a, a kar li nan North American box office-ah a No.1 leh ta, film tlangzarh tawh zingah weekend vawi lina a sum lakluh tam theihah pakuana a ni pha.
‘Barbie’ hian US-ah dollar maktaduai 500 aia tam a lalut tling tawh a, US pawnah dollar maktaduai 657 lalut tawh bawkin, khawvel huapin dollar tluklehdingawn 1.18 a lalut tling ta a, Warner Bros. film tihchhuah tawh zawng zawnga sum lalut tam ber dawttu niin, Warner Bros. film-ah chuan Harry Potter film hnuhnung ber chiah kha a pha lo.
‘Barbie’ film director Gerwig pawh hmeichhe film director zinga film pakhat hmanga sum lalut tam record siamtu a ni ta a, a hmaa he record siamtu, dollar tluklehdingawn 1.13 lalut thei film ‘Captain Marvel’ director Anna Boden leh Ryan Fleck te a lehpel ta a ni.
Christopher Nolan film siam ‘Oppenheimer’ pawh a la kaltluang viau a, dollar maktaduai 18.8 lalut lehin, US-a a lalut zawng zawng chu dollar maktaduai 264 a tling ta a, US pawn a a lakluh nen chuan dollar maktaduai 649 a tlin ve der tawh bawk.
Teenage Mutant Ninja Turtles: Mutant Mayhem-in weekend vawi hnihnaah dollar maktaduai 15.8 lalut lehin No.3 a ni a, he film pawh hian ni 10 chhungin US-ah dollar maktaduai 72.8 a lalut tling tawh a, US pawna a lakluh nen chuan dollar maktaduai 94.7 a tlin ve ta bawk.
Meg 2-in dollar maktaduai 12.7 lalut lehin No.4 a la ni a, he film pawh hian US-ah dollar maktaduai 54.1 a lalut tling ta a, US pawna a lakluh nen chuan dollar maktaduai 256.9 a tlin ve ta bawk.
Film tlangzarh thar, dracula film ‘The Last Voyage of Demeter’-in dollar maktaduai 6.5 lalutin No.5 a ni a, he fil hi Bram Stoker-a novel ‘Dracula’-a chapter pakhat, sumdawng lawng Demeter chanchin behchhana a chan a ni. Demeter lawng hian Carpathia atanga London thlengin bawm 50 a phur thleng a, mahse, London a thlen chuan lawng hnathawktu te chu an chin hriat lohin an bo vek a ni.
Indian film Rajinikanth channa ‘Jailer’-in dollar maktaduai 2.56 lalutin No.10 a ni a, he film hian ni 4 chhungin US-ah dollar maktaduai 4.14 a lalut hman a ni.
Box office top 10:
1 Barbie $33,700,000
2 Oppenheimer $18,800,000$264,269,000
3 Teenage Mutant Ninja Turtles: Mutant Mayhem $15,750,000
4 Meg 2: The Trench $12,700,000
5 The Last Voyage of the Demeter $6,500,000
6 Haunted Mansion $5,614,000
7 Talk To Me $5,116,277
8 Sound of Freedom $4,832,374
9 Mission: Impossible Dead Reckoning Part One $4,665,000
10 Jailer $2,560,000