Barca chakpuitu super sub Torres
Signal Iduna Park Nilaini Champions League inkhel second half chhunga goal nga ngawt lut zinga goal hnih thawhtu second-half substitute Ferran Torres chuan Borussia Dortmund laka 3-2-a Barcelona chakpuiin, he result avang hian Catalan team chuan Champions League table-ah pahnihna an luah chho.
Inkhel entu tamna Germany rama league stage inkhelah hian first half chhungin goal a lut zo lo a; second half tir lamah Barca captain Raphinha chuan Dani Olmo siamsak atangin mikhual hmahruaina goal a khung er zawk a; mahse, Dortmund lam hian a hnu rei vak loah penalty atangin an siphurh an sut zui ve leh mai a, rawlthar Serhou Guirassy chuan penalty area chhunga Pau Cubarsi namthluk avangin penalty a hlawhchhuak a, chu mi hmang chuan Guinea forward hian nal zalhin spot-kick a chhuihlut.
Minute 75-ah Dortmund keeper Gregor Kobel chuan Fermin Lopez-a goal tur dansak mah se a hmun dik taka ball lo changtu Torres chuan mikhual hmahruai nawnna goal a tilut a; minute thum a kal leh tihah Guirassy bawkin a tum hnihna atan Pascal Gross thawhrah atangin Bundesliga club siphurh a sut nawn leh a, Barcelona keeper Inaki Pena tana dan ngaihna awm lo thil a ni!
Hun pangngai tawp hma minute nga a la awm tihah Lamine Yamal siamsak atangin Torres chuan he match-a a goal hnihna leh Nou Camp club chakna goal ni zui ta a thun a, knockout play-off round khelh buai ngai loa last 16 lut thei chin tur top eight luah thei turin La Liga giants dinhmun a tha zual sawt.
Germany ram inkhel first half lai khan Raphinha chuan a tir lamah goal thun theihna hun tha bawhpelhin, Yamal-a siamsak chu goal-ah a chantir zo lo a; chawlhlawk hma vek khan Austrian midfielder Marcel Sabitzer pawhin Julien Duranville-a siamsak atanga a hun tha hmuh chu goal kham chungah thlawhchhuakin mualneitu team beiseina a tithlawn ve bawk.
Mipui 81,365 pungkhawm hmaa inkhel tan phat atanga inkhel thunun nghal Barcelona tan hian a tir lamah an top scorer Robert Lewandowski pawhin a hun tha neih goal-ah a chantir zo lo ve bawk a, Pole hian goal a khung lo tluan ta nghe nghe.
Tarlan tak angin, league phase khelh hnih hmabak la nei chungin Barcelona hian point 15 nen table-ah pahnihna an luah chho a; an kawtkaia tlawm pumpelh zo lo German-ho erawh point 12 hum chungin pakuanaah an tlahniam thung a, automatic qualification nena round of 16 lut pha chin huang pawn lamah an tawlhchhuak leh ta rih a ni.
Barca coach Hansi Flick chuan inkhelh bana amah bawrtu reporter-ho hmaah a naute khelh dana a lawm thu sawi chungin goal khung lo mah se first half-a an khelh dan pui a tih thu hahipin a sawi a, second half-a goal an inthunchhawk zauh zauh chungin pawhin a team-te’n dam dap leh solid em emin an khel thei reng tih a sawi.
Thawhlehni khan Uefa Champions League inkhelah bawk Bundesliga club dang Bayern Munich chuan 5-1-in mualneitu Shakhtar Donetsk an sawp thung a, anni pawhhi Barcelona ang bawka last 16 luh hnaih kuar tawh an ni.
VELTINS-Arena mipui 57,079 pungkhawm hmaa an point thum hmuh leh nen Bavarians khan standing-ah pariatna luahin, kum thar January thla hian an hmabak khelh hnih la awmah Feyenoord leh Slovan Bratislava an tum leh ang.
Thla thara Brest leh Borussia Dortmund khel leh tur Shakhtar erawh 27-naah an su leih leih a, league phase paltlang lo tur zinga mi an ni!
AC Milan 2-1 Red Star Belgrade
Nilaini zan inkhel dangah goal thun hmasa zet chungin Serie A club-in an kawtkaiah point thum an hlawhchhuak zo lo teuh viau a, minute thum chauh awm tawha Tammy Abraham-a goal an chakpui hram a ni.
Giuseppe Meazza khel- muala fans 53,717 thu tlim hmur hmaah mualneitu team hian goal an khung thei lawk lo a, chawlhlawk hma minute thum chiah awm tawhah Rafael Leao chuan season kal laia a goal rukna hmangin Italian mipui a autir thei hram a ni.
Second half laihawl an khelh thlen dawnah Red Star beilet tan Nemanja Radonjic chuan Yunus Musah ball ken lai chhuhsakin Milan keeper Maignan-a dan zawh loh goal hmangin mikhual team siphurh a sut ve leh.
Hliamin a tihbuai Milan lamin an hmahruaina an neilet zo ta mai lo a, an chak zo lo takngial dawn nia a lan hnu minute thum chiah awm tawhah Abraham-a chakna goal khung lai thlir tur a awm zui ta a ni.
Italian team-ah Ruben Loftus-Cheek chuan inhliam Christian Pulisic hmunruak a luah a; first half chhungin Pulisic pawh hi hliam avang bawkin a baichhuak a, Samuel Chukwueze chuan thlakin, hliam vanga khelh chhunzawm thei lo dang Alvaro Morata pawh Abraham-a’n a thlak ve bawk.
San Siro hnehna nen point 12 hum chungin an standing-a 12-na nen Milan-in Champions League knockout stage an lut a, 2004-05 final an thlen hnua last 16 an luh leh vawikhatna niin, Red Star erawh knockout play-off round pawh an khel pha dawn ta lo thung.
Nilaini UEFA Champions League
League Stage result
Atletico Madrid 3-1 Slovan Bratislava
Lille 3-2 Sturm Graz
AC Milan 2-1 Red Star Belgrade
Arsenal 3-0 Monaco
Benfica 0-0 Bologna
Borussia Dortmund 2-3 Barcelona
Feyenoord 4-2 Sparta Prague
Juventus 2-0 Manchester City
Stuttgart 5-1 Young Boys