Barca friendly match khelh tur an thulh
Season thar atana inbuatsaihna an tan chho leh tawh a, Pathianni hian Barcelona club pawh pre-season friendly match pakhatah Vissel Kobe chu Tokyo khawpuia infiampui tur an nih laiin he inkhel promoter-te’n contract an bawhchhiat avangin he match hi thulh a ni.
Japan tlawh hi Asian tour hmasa lama tel niin, Japan atang hian South Korea lama pakai leh tur an ni a, hei pawh hi an kaltlangpui dawn em a hriat rih lo.
Barca thuchhuah chuan an tour buaipuitu (promoter) hming hi tarlang lo mah se tour an puan tirha an lam rik Yasuda Group kha ni tura ngaih a ni.
Catalan team thuchhuah chuan Pathiannia Japan ram khawpui bera an inkhel tur thulh a nih thu puang chungin an inremna anga promoter an kal lo chhunzawm a nih chuan South Korea pawh an pan lo mai thei tih an sawi a; Japan rama fan tam tak an neih thu leh an duh loh anga thil a thlen avangin pawi an tih thu an sawi.
He thu buatsaih lai thlengin Yasuda Group lam hian thuchhuah an la siam ve chiah lo niin a lang a; Barca nena inhmachhawn thei ta lo tur J1 League champion Vissel Kobe chuan an inkhelh hun nghakhlel taka lo thlirtu fans leh inhnamhnawihna dang nei zawng zawngte chungah thupha an chawi.
Season liamtaa a vawi 28-na atana La Liga title hlawhchhuak Nou Camp club hian, ruahman lawk ang chuan, July ni 31 hian South Korean club FC Seoul an infiampui ang a, August ni 4-ah Korean club dang Daegu an hmachhawn leh ang.
South Korea lama inkhel tur buaipuitu D-Drive chuan harsatna thlen an tum loh thu leh hriat reng hlawh tur match puitlin ngei an tum thu fans an hriattir thung.
Barcelona hian August ni 16 khian an league title kawl lai humhim tura an chetchhuah vawi khatnaah Mallorca an hmachhawn dawn a ni.
Barca friendly match khelh tur an thulh
