Barca tlawm ni herchhuak ve ta nge nge

Barca tlawm ni herchhuak ve ta nge nge
An league game hmasa pasariha chak fai vek Barcelona chuan Inrinni zanah season kal lai tualchhung league-a an tlawm vawikhatna an dang zo ta bik lo a, hmahruaitu team hi Osasuna khelmualah 4-2-in an chak lo.
An khelmual league game-a la tlawm lo Osasuna tan Ante Budimir chuan goal hnih thunin, Bryan Zaragoza leh substitute Abel Bretones-te’n goal khat ve ve an thawh ve bawk.
Croatia striker Budimir chuan minute 18-na lekah Bryan Zaragoza cross atangin mualneitu team hmahruaina goal a tilut a; darkar chanve khelh tlin hma lawkin goal hmasaber siamchhuaktu Zaragoza hian goalkeeper Inaki Pena ven goal-ah sihnih faia Osasuna hmahruaina goal a thawh ve leh.
Second half tir lam minute 53-ah Pau Victor chuan Barcelona siphurh pakhat zawk sutna goal thawhin, a ball thawnluh chu Osasuna goalkeeper talbuai Sergio Herrera chuan an lam goal-ah a hailut thei hram a ni!
Goal hmahruai khungtu Budimir bawkin Osasuna goal phai chhungkhat zui lehin, hei chu penalty atanga a chhuihluh a ni ta thung a, box chhungah Sergi Dominguez chuan a titlu a, a hlawhchhuah penaltu chu goal-ah a chantir.
Hun pangngai tawp hma minute nga la awmah Abel Bretones chuan 4-1 tehrenga mualneitu team hmahruaina goal thawh ve lehin, minute 89-ah substitute Lamine Yamal chuan Ferran Torres thawhrah atangin league hmahruaitu team thangtlawm lutuk tur tiziaawm turin goal khat a khung ve leh bauh a; nizan Madrid derby result tarlan hman lohah Atletico Madrid hneh se defending champion Real Madrid chuan point khat bawkin an chung chiaha mite hi an thlau chhunzawm leh thei dawn a ni.
Barca hian naktuk zan Champions League-ah Young Boys an mikhual dawn a, Europe-a an bultanna inkhelah Monaco an hneh loh ringawt tawh avangin Europe club inelna lian lamah hian an insawrbing hle tih a hriat a, La Liga table-a parukna luahtu Osasuna game-ah hian an manager Hansi Flick chuan a regular starter pathum – Lamine Yamal, Raphinha leh Inigo Martinez-te chu bench lamah a thuttir a, El Sadar Stadium-a hriam ve tlat Osasuna lakah an line up tha ber dawttu hmangin Nou Camp club-in point an thawkchhuak zo lo.
Tarlan tawh angin, Bundesliga club lian Bayern Munich atanga loan-a an hawh fuh zet winger Zaragoza chuan Budimir-a goal hmahruai tauhluh tur a chhawpsak bakah kum 23 mi hian minute 10 hnuah Osasuna hmahruaina a belhchhah ve leh ngat a ni.
Point 21 hum chungin table-ah Barca la chungnun chhunzawm bawk mah se pahnihna Real Madrid-in an hnaihchilh theih dan tarlan a ni tawh a; point 14 neitu Osasuna-in parukna an luah.