Table-a pahnihna luah chho thei turin Catalan team-in chance an nei a, mahse, Athletic Bilbao khelmualah goal thun zo loin mualneitu team nen goal awm loin an inhnehtawk.
Barcelona hi tun season La Liga bikah an khelmual pawn lama an inkhelhin an la tlawm lo tluang zel a, vawisarih chakin draw vawiruk an nei tling ta a ni.
Nou Camp club hian table-ah pathumna luah chhunzawmin, hmahruaitu Real Madrid lakah point riatin an hniam a, an chung chiaha pahnihna luahtu Girona chu point khatin an pha lo.
Basque team khan an mikhualte an hrechiang a, tlarhnung lam an veng uluk a, counter-attack chu an innghahna pui ber niin, goal venhim kawngah hlawhtling bawk mah se counter-attack lamah erawh an chefuh zo ta bik lo a, an kawtkaiah goal an thun zo lo.
Girona pawh hian Real nena an inkar pawtzim turin hun tha nei ve bawk mah se Pathianni inkhel dangah sikhat faiin mualneitu Mallorca an hneh zo lo a, pathumnaa chhuk thei tur an nih laiin Barcelona chak zo lo hlawkpuiin pahnihna dinhmun an la luah zui der der.
Barca tan Joao Cancelo chuan goal thun theihna hun remchang hmu mah se hla der dawrh atanga a shoot chu line a pelh hma chiahin Yeray Alvarez chuan hmunhimah a theichhuak hman.
March ni 12 Champions League last-16 second leg-a Napoli hmachhawn tur an nih laiin Pathianni game-ah Frenkie de Jong leh Pedri-te’n hliam avangin khelmual an chhuahsan a ngai a, Pedri phei chu bench-a a thut hnuah a tap hial a, Barcelona boss Xavi tan a player tha pahnih inhliam hi engtiang taka pawi thei nge a nih dawn hriat theih a ni rih lo.
Inrinni khan hmahruaitu Real Madrid pawh Valencia mualah chak zo bik loin mualneitu team nen 2-2-in an inhnehtawk a, Barcelona-in point ruk chauha Real um pha lo thei an nih laiin an chak zo ta bik lo a ni.
Atletico Madrid 2-1
Real Betis
Pathianni La Liga inkhel dangah Atletico an chak ve thung a; inelna hrang hrang belhkhawma vawitum hnehna an chan zawh loh zawn hnuah Diego Simeone-a team-in chak lawm tur an nei ve leh ta a ni.
Atletico Madrid goal khat hi Rui Silva own-goal atanga an hlawhchhuah niin, Alvaro Morata chuan goal khat dang a tauhlut ve bawk.
Simeone-a team hi karliamta laihawlah khan Copa del Rey semi-final lamah mualneitu Athletic Bilbaos chuan sithum faiin an sawp a, tualchhung league lamah palina luah nghet chhunzawm turin chak an mamawh a, rim taka thawkin an kawtkaiah point thum an hlawhchhuak a, La Liga top-four chhuahsan lo zawngin an khawsa zui leh thei ta a ni.
Atletico Madrid hi an home-a Spanish La Liga match an khelh hnuhnung vawi 25-ah an tlawm lo fai vek a ni.
Barcelona zinchhuak chak zo lo
