Michael Wallhead hi thil danglam tak tak hmuhchhuah leh siamchhuah kawngah a hmingthang riau a, tunah pawh bawlhhlawh bawm (trash can) tlan thei a siam chhuak a, a bawlhhlawh bawm chu 66mph a chakin a tlan thei a, Guinness World Record-in khawvela bawlhhlawh bawm tlan chak thei berah a puang.
Hetiang record hamsa pawh Michael-a siam bawk hi a ni a, 2023 khan bawlhhlawh bawm 55 mph a chaka tlan thei a lo siam tawh a, chumi tuma a bawlhhlawh bawm tlan thei hmingah chuan The General Waste a ti nghe nghe a, tunah a record hi amah ngeiin a rawn khum leh ta a ni.
Wallhead chuan hetiang record siam duhna neihtirtu chu amah aia record siam hmasa zawk Andy Jennings a nih thu a sawi a, Andy hian 2020 khan 45mph a chaka tlan thei bawlhhlawh bawm hmangin record a lo siam tawh a, “Andy nen hian kan titi dun hnuah a record khum tumin ka bei ta a ni,” a ti.
Wallhead hian Facebook-a thil zawrhna atangin bawlhhlawh bawm lir thei dollar 25-in a lei a, dollar 900 vel sengin a siam danglam a, Suzuki GP125 twi-stroke engine, magnesium go-kart wheels leh rear axle bakah 5 gear box, chassis, steering damper te a dah belh a, chu chu record siam nan a hmang ta a ni.
Bawlhhlawh bawm tlan chak record siam
