Nimin khan AMC Corporator-ten bawlhhlawh khawn leh sawngbawl kawnga dan thar Solid Waste Management Rules, 2026 zirchianna hun an hmang a. Aizawl khawpui felfai zawka a than theih nan AMC-in dan a kenkawh hrang hrangte mipuiten tha taka an zawm a pawimawh dan te sawi ho a ni.
Aizawl khawpui chhunga bawlhhlawh sawngbawl danah hmasawnna chak em em lo mah se, hma chu kan sawn ve zel a. Bawlhhlawh khawnkhawm chungchangah pawh tunhma deuha bawlhhlawh dahkhawlna hnuh kal theih chi (garbage trailer?) kawngsira hun thin kha kum 2017 vel atangin lirthei pangngai (garbage truck/van) hmangin kan thlak tawh a. Tuirial Airfield Venga bawlhhlawh paihna hmunpuia bawlhhlawh mût khu vung vung thin pawh tunah chuan hmuh tur a awm tawh lo; felfai taka bawlhhlawh sawngbawlna hmun Solid Waste Resource Management Centre kan nei leh tawh bawk. Tunah hian bawlhhlawh halralna Incinerator pawh din mek a ni bawk a, bawlhhlawh sawngbawl kawngah kan phuisui chho tan viau a ni.
Hetih lai hian, bawlhhlawh thehthang kawngah sawrkar lamin Rules tha tak tak siamin han hmang thin bawk mah se, dan zawm kawngah mipui lam kan la hniam tlangpui a tih theih awm e. Mipui lamin dan kan zawm that leh that loh lan chian em emna chu, kawngsir, tuiluankawr, kawr ruam leh lui tui bawlhhlawh dan atang hian, sawi tam vak ngai lovin, a lang chiang hle.
India sawrkarin kum 10 kal ta 2016-a SWM Rules a siam kha tunah chuan dan thar SWM Rules, 2026-in a thlak a, kumin April ni 1 atanga hman tan tura tih a ni. He rules tharah hian bawlhhlawh thliar hran dan chi li (4) wet waste, dry waste, sanitary waste leh special care waste te hman a ni dawn a. Tuna kan kalpui danah hi chuan wet leh dry a ni tawp a, hmun thenkhatah chuan thliar hrang lova lakkhawm a la ni bawk.
Eng pawh ni se, khawpui chhunga bawlhhlawh lakkhawm dan tur chu AMC lamin an la rawn puangzarin mipui zirtirna hun te pawh an la rawn nei turah ngai ila. A pawimawh ber chu, khawi hmunah pawh awmin khawiah pawh kal ila, keimahni theuh hi kan bawlhhlawh siam phurtu/kan bawlhhlawh bawm ni theuh tura kan inbuatsaih a pawimawh dawn hle a ni.
Bawlhhlawh bawm…
