Aizawl khawpui bawlhhlawh lakkhawm paihna leh sawngbawlna tura ruahman, Hualngohmun rama Solid Waste Management Centre: Phase-I din mek chu tha taka sak zawh thuai a nih theih dan tur Mizoram State Project Monitoring Committee chuan a ngaihtuah.
Project Monitoring Committee hian he hmun hi kumin April 26 khan hna kal mek leh hmalakna a hmunah an lo thlir tawh a, tun tum thutkhawmah hian hma lak chhunzawm zel dan tur an sawi ho.
He Solid Waste Management Centre hi Special Assistance to State Capital Expenditure (SASCE) fund cheng vaibelchhe 16.64 hmanga din niin, bawlhhlawh ton 50 (tawih thei lo ton 25 leh tawih thei ton 25) dawl zo thei tura ruahman a ni. PWD chu implementing department niin, nodal department chu UD&PA a ni a, AMC-in a enkawl zui dawn a ni.
Tun tum thutkhawm hi MSPMC vice chairman Lal Rinawma, IRS (Rtd) chuan kaihruaiin, MSPMC secretary Er. Vanlalruata Sailo, member – Planning principal adviser Dr Lalrinchhana, task force (MSPMC) George Lalzuia, R Lalchhanhima, Vanchhungi te an tel a. PWD atangin chief engineer Hrangthanga Zote leh superintending engineer Lalrinngeta, chief architect Lalchhandami leh superintendent Lalawmpuii, UD&PA director Dr. Andrew H. Vanlaldika, AMC joint commissioner Lalremruata Kullai, Smart City deputy CEO V Lalruatliana, consultancy firm atangin coordinators – Dr Lalmuansangi leh Zohmangaiha te an tel a ni.
Hualngohmuna Solid Waste Management Centre Project hi hlawhtling taka din a nih theihna tur leh a hmanna tur dik tak angin Aizawl khawpuiin a hman theih nan rawtnate thawhkhawm a ni.
Bawlhhlawh sawngbawlna zawh ran dan tur ngaihtuah
