Bawnghnute thar tam lamah Mizoram-in tan lak a la ngai – Union minister

Bawnghnute thar tam lamah
Mizoram-in tan lak a la ngai
– Union minister
Union minister for Fisheries, Animal Husbandry & Dairying Rajiv Ranjan Singh chuan Thawhtanni khan Thuampui-a MULCO Dairy a tlawh.
A ministry enkawlpuitu minister of state pahnih – George Kurian leh Prof SP Singh Baghel bakah Mizoram minister pathum – AH & Vety changtu C Lasawivunga, Cooperation changtu PC Vanlalruata, Fisheries changtu Lalthansanga, National Dairy Development Board aiawh, Mizoram Milk Producer’s Cooperative Union Limited leh official dangten an tawiawm.
MULCO Dairy hmunah hian Mizo Café leh FPO office -cum- sale outlet a hawng nghal a. Hemi hnu hian MULCO Dairy Processing Plant a tlawh. National Dairy Development Board (NDDB) official-ten milk processing plant 20 TLPD tihchangtlun leh tihchak dan tur sawipuiin, an mamawh an lo thlen a ni.
Union minister chuan dairy cooperative leh thawktute hmalakna avanga MULCO-in hma a sawn hret hret chu lawmawm a tih thu a sawi a. Central leh state sawrkar thawk hoin hma an lak chhunzawm zel tur dawn tih a sawi a ni.
Mizorama bawnghnute thar chhuah dinhmun a la tlem hle a, kan mamawh min la phuhru tawk lo tih sawiin, “Kan chhehvel state aiin kan hnufual bik tur a ni loa, NE state dangte kan umphak a, kan pelh theihnan ranvulhtu leh official-ten tan la thar zel ang che u,” a ti.
Sawrkar laipuiin sum (matching share) a thawh dan thlak danglamin, 75:25 ni thin chu tunah chuan 90:10-a thlak a ni tawh dawn tih a sawi a. Hei hian state sawrkar sum thawh tur nasa taka a tihhniam avangin hmasawnna hnathawh a chak phah hle dawn a. Ranvulhtute leh state sawrkar tan chanchin lawmawm a ni tih Rajiv Ranjan Singh hian a sawi.
Milk processing plant leh village level procurement system-te tihchangtlun zel a ni anga, NDDB nen thawk dunin bawng chi tha (kah rai tur) leh ran chaw tha farmer-te hnenah awlsam zawka chhawp chhuah a ni dawn a. MULCO hmangin Mizorama thar – paneer, rasmalai leh bawnghnute hriak (ghee) Aizawl leh a chhehvel bazar-ah nasa zawka zawrh a ni dawn tih a sawi a. Sawrkar laipui chuan hmarchhak bial hmasawnna turin thlawpna tha ber pek a inhuam a, chutihrualin heng hmalakna hlawhtlinna tak tak chu state sawrkar leh ranvulhtute tan laknaah a innghat tih a sawi a ni.